भांगरभूंय | प्रतिनिधी
नवी दिल्ली, खबरां संस्था ः चीन आनी अमेरिके कडेन सर्त करपा खातीर भारत फुडल्या 10 म्हयन्यांत आपलो स्वताचो आर्टिफिशियल इंटेलिजन्स (AI) चॅटबॉट तयार करतलो. केंद्रीय म्हायती तंत्रज्ञान मंत्री अश्विनी वैष्णव हांणी ही घोशणा केली. देशांतलें लार्ज लँग्वेज मॉडेल (एलएलएम) 10 म्हयन्यांत तयार जातलें. हें मुळावें मॉडेल आसतलें. ताची रुपरेखा तयार केल्या अशी म्हायती तांणी दिली.
मंत्री अश्विनी वैष्णव हांणी सांगलें, संगणकीय मुळावी बांदावळ ही एआय खातीर सगळ्यांत म्हत्वाची आसा. भारतान हे बाबतींत 10,000 जीपीयू क्षमतायेचे लक्ष्य साध्य केलां. आतां तें 18600 जीपीयू मेरेन वाडयतले. जीपीयू म्हळ्यार ग्राफिक्स प्रोसेसिंग युनिट (चिप). खंयच्याय प्रकारचें भास मॉडेल तयार करपाक खूब प्रगत जीपीयू जाय पडटात.
स्वदेशी एआय चॅटबॉट हो भारताच्या आर्टिफिशियल इंटेलिजन्स (एआय) येवजणेचो एक भाग आसा. हे मोहिमेक भारत 10,750 कोटी रुपया खर्च करता. देशाक प्रगत तंत्रगिन्यानाचें केंद्र करप हो ताचो हेत आसा. भारतीय एआय चॅटबॉट चॅटजीपीटी आनी डीपसीक वेगळो आसतलो. तातूंत सगळ्या भारतीय भाशांनी जापो आनी मजकूर आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
