भांगरभूंय | प्रतिनिधी
यकृताचे (लिव्हर) दुयेंस ह्या दिसांनी वाडत आसात. यकृत हो आमच्या कुडीचो म्हत्वाचो भाग. अन्न वा हेर खाणाचे योग्य पचन करपाक यकृत जापसालदार आसता. ताचे काम इबाडलें की ताचो आमचे भलायकेचेर थेट परिणाम जाता. मजगतीं, हालींच्या एका अहवालांतल्यान मेळिल्ल्या म्हायती प्रमाण, 10 मदल्या एक ते तीन भारतीयांक यकृताची समस्या आसा. भारतांतल्या नॉन-अल्कोहोलिक फॅटी लिव्हर दुयेंसाचे वाडटे प्रमाण आडावपा खातीर केंद्रीय भलायकी मंत्रालयान सक्रिय पावल उबारलां. भौशीक भलायकेचो हो म्हत्वाचो हुस्को सोडोवपा खातीर तांणी मार्गदर्शक तत्वां आनी प्रशिक्षण पुस्तिका जारी केल्यात.
मोटसाण, गोडेंमूत आनी काळीज आनी रगतपेशी संबंदीची समस्या ह्यो भारतांतल्यो वाडत वचपी समस्या. केंद्रीय भलायकी सचीव अपूर्व चंद्रा हांच्या म्हणण्या प्रमाण भारतान एनएएफएलडीक मुखेल एनसीडी म्हूण वळखुपाक फुडाकार घेतला. 10 मदल्या एक ते तीन जाणांक यकृताची समस्या आसा ही चिंतेची गजाल.
१. वजनाचे नियंत्रण
यकृताची समस्या आसल्यार मोटसाण ही एक मुखेल समस्या, देखून समतोल आहार आनी नेमान व्यायामा वरवीं वजन नियंत्रणांत दवरचें.
२. संतुलीत आहार घेवचो
फळां, भाजीपालो, पुराय कड्डणां आनी प्रथिनां भरपूर आशिल्ल्या आहाराचेर लक्ष केंद्रीत करचें. साकर नियंत्रणात दवरात. संसर्ग जावपाचो धोको आशिल्ल्यान कच्चें वा कमी शिजयल्लें अन्न खावप टाळचें.
३. नेमान व्यायाम करचो
वजन आनी यकृतांतली चरबी उणी करपा खातीर शारिरीक हालचाली चालू दवरात. सप्तकांत उण्यांत उणें 150 मिनटां मध्यम एरोबिक व्यायाम करपाचो यत्न करात.
४. सोरो टाळचो
यकृताचें लुकसाण जावचें न्हय म्हणून सोरो पियेवपाचेर मर्यादा घालची.
५. लसीकरण करात
हिपॅटायटीस A आनी B हांचेखातीर लस मेळटा, जाका लागून ह्या व्हायरसाच्या संसर्गाक लागून यकृताचें लुकसाण जावपा पसून आडयता. तुमकां धोको आसल्यार लसीकरणा विशीं दोतोराचो सल्लो घेयात.
६. वखदां घेतना जतनाय घेवची
कांय वखदां चड प्रमाणांत घेतल्यार वा अल्कोहोल वांगडा घेतल्यार यकृताक लुकसाण जावं येता. खंयच्याय वखदाच्या दुश्परिणामा विशीं सदांच दोतोराचो सल्लो घेयात.
७. नेमान भलायकी तपासणी
नेमान तपासणी केल्यार यकृताची समस्या बेगीन सोदून काडपाक मजत जाता. मोटसाण वा कुटुंबीक यकृताच्या दुयेंसाचे इतिहास आसल्यार तुमच्या दोतोरा कडेन चांचणी पर्यायां विशीं चर्चा करात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
