भांगरभूंय | प्रतिनिधी
पणजी ः गोंयच्या कला मोगीं खातीर एक आगळोच कला महोत्सव घडोवन हाडटात. 10 ते 13 नोव्हेंबर दि आर्टिस्ट ग्रुप वतीन कला अकादमी, पणजी ‘गोंय आंतरराष्ट्रीय कला महोत्सव – सीझन 01’ ही भव्य कार्यावळ आयोजीत केल्या.
चार दिसांच्या ह्या महोत्सवांक लागून भारतांतल्या कला मळार नव्या युगाची सुरवात जातली. केरळ राज्यांतल्या 36 नामनेच्या कलाकारांचीं कला तातूंत प्रदर्शीत करतले, दरेक कलाकार आपली खाशेली कला, भावनीक शैली आनी सृजनशील कल्पना माचयेर सादर करतले. पारंपारीक शैलीं सावन आधुनीक कलेच्या वेगवेगळ्या माध्यमांतल्या कलांक लागून ह्या महोत्सवांत प्रेक्षकांक एक आगळो वेगळो कला अणभव मेळटलो. गोंयच्या सैमीक दर्यादेगेचे फाटभुंयेर आनी कला अकादेमीच्या कला समृध्द वातावरणांत ह्या महोत्सवाक लागून कलाकार, कला मोगी आनी सामान्य प्रेक्षक हांचे मदीं संवाद, सृजनशीलताय आनी सहकार्याची नवी दिका निर्माण जातली अशी आस्त आयोजकांक आसा.
ह्या प्रदर्शनाची क्युरेटर रेहना आसात. तिची कलात्मकता आनी सौंदर्य नदर ह्या प्रदर्शनाक सुसंवादी कलात्मक एकवट करुन दिवपी आसा. वेगवेगळे रंग, भावना आनी विचार हांच्या संगमाचो आकार घेतिल्लो हो कला उत्सव सगळ्यांच्या यादींत उरतलो. गोंय आंतरराष्ट्रीय कला महोत्सव सीझन 01 दृश्य कलेची मेजवानी आसतली, कला आनी संवेदनशीलतेचो आनंद घेवपाची ही एक आगळीच संद आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
