भांगरभूंय | प्रतिनिधी
गांवगिऱ्या पर्यटनाचे उदरगती खातीर पर्यटन खात्या कडल्यान खर्च
भांगरभूंय । प्रतिनिधी
पणजीः गोंयच्या गांवगिऱ्या पर्यटनांचे उदरगती खातीर पर्यटन खात्यान 10 कोटी रुपया मोडल्यात. गांवगिऱ्या वाठारांत सुविधा बांदपाक आनी देवळांचें सोबितीकरण कामांचो हातूंत आस्पाव आसा. जाल्यार गांवगिऱ्या पर्यटनाची फक्त रेडियो वयल्यान जायरात करपा खातीर खात्यान 3 लाखां परस चड पयशे मोडल्यात ही अजापाची गजाल.
विधानसभेच्या पटलार दिल्ले लेखी जापेंत पर्यटन मंत्री रोहन खंवटे हांणी सांगलां, गांवगिऱ्या पर्यटानाक चालना मेळची म्हूण उदरगतीचीं 11 कामा आनी उपक्रम हातांत घेतल्यात. तातूंत देवळांची दुरुस्ती, सोबितीकरण आनी सुविधा दिवपाचीं 7 कामां हातांत घेतल्यांत जाल्यार गांवचे उदरगतीचीं दोन कामां तशेंच रेडियोचेर प्रचार मोहीम करपाचो एक उपक्रम हातांत घेतला.
11 मदलीं आठ कामां पुराय जाल्यांत जाल्यार तीन कामां अजून पुराय जावपाचीं आसात. ह्या 11 कामां खातीर खात्यान 10,67,50,222 रुपया मोडल्यात. 11 कामांतल्या 10 कामांच्या खर्चाचो तपशील खात्यान दिला जाल्यार दोन कामांचो तपशील दिवंक ना. सत्तरी नगरगांव ब्रम्हकरमळेच्या ब्रम्ह देवस्थानांत पर्यटकां खातीर पार्कींग आनी पर्यटकांक लागपी हेर गरेजेच्यो सुविधा उबारपा खातीर खात्यान 1,12,31,490 रुपया खर्च केल्यात. 10 नोव्हेंबर 2021 ह्या दिसा सुरू केल्लें हें काम पुराय जालां, अशें जापेंत खंवटे हांणी म्हणलां.
दिवचलचे ब्राम्हणशेवर देवळाची दुरुस्ती आनी सोबितीकरणा खातीर खात्यान 1,91,36,931 रुपया मोडल्यात. 24 डिसेंबर 2021 ह्या दिसा हातांत घेतिल्लें हें काम आतां पुराय जालां. गांवगिऱ्या पेडणें म्हालांत उदरगती खातीर सावंतवाड्या वयल्या भुमिका देवळांत गरजेच्यो सुविधा दिवप आनी सरभोंवतणी लायटी घालपा खातीर खात्यान 1,76,10,620 रुपया मोडल्यात. 24 डिसेंबर 2021 ह्या दिसा सुरू जाल्लें हें काम आतां पुराय जालां, अशें जापेंत म्हणलां.
केपें म्हालांतल्या बाळ्ळी गांवच्या सर्वे नं. 1/0 त सुविधा उदरगतीच्या कामाचेर खात्यान 1,23,34,357 रुपया खर्च केल्यात. 10 ओक्टोबर 2022 ह्या दिसा सुरू जाल्लें हें काम पुराय जालां. आदिवासी समाजाच्या कल्याणा खातीर पर्यटन खात्यान 85,56,587 रुपया खर्च करून उदरगतचें काम हातांत घेतिल्ले. 21 जानेवारी 2022 ह्या दिसा सुरू जाल्लें काम आतां पुराय जालां. तशेंच केपें म्हालांतल्या मोरपिर्ला गांवाच्या सर्वे नं. ¼ त उदरगतीचें काम खात्यान 20 जानेवारी 2022 ह्या दिसा हातांत घेतिल्ले आनी आतां तें पुराय जालां. पूण हाच्या खर्चाचो तपशील खात्यान दिवंक ना. फोंडें म्हालांतल्या शिरोडें गांवचें शिवनाथ देवळाचेर 31,16,590 आनी श्री महामाय देवळाचेर खात्यान 1,18,15,898 रुपया मोडल्यात. शिवनाथ देवळाचें काम 11 जानेर 2022 ह्या दिसा हातांत घेतिल्लें, तें पुराय जालां. जाल्यार 25 मे 2022 ह्या दिसा हातांत घेतिल्लें श्री महामाया देवळाचें काम अजून चालू आसा.
24 फेब्रुवारी 2024 ह्या दिसा बार्देस म्हालांतल्या चावडेश्वर मंदिराची दुरुस्ती आनी सोबितीकरणाचें हातांत घेतिल्लें काम अजून पुराय जावपाचें आसा. पूण ताच्या खर्चाचे तपशील खात्यान दिवंक ना. ते भायर पर्यटन खात्यान गावगिऱ्या पर्यटनाची रेडियोचेर जायरात केल्ली. 1 ते 16 मार्च 2024 मेरेन दुदसागर घसघसो आनी तांबडी सुर्लाचे महादेव देवळाचेर 92.7 बीग एफएमचेर रेडियो मोहीम सुरू केल्ली. फक्त 16 दिसांचे मोहिमेचेर खात्यान 3,25,671 रुपया मोडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
