भांगरभूंय | प्रतिनिधी
डॉ. सावंतः तीन वर्सांत पुरयलीं 14,745 फोंडकुलां
भांगरभूंय । प्रतिनिधी
पणजीः फाटल्या तीन वर्सांत भौशीक बांदकाम खात्यान गोंयांतल्या विवीध रस्त्यां वयलीं 14,745 फोंडकुलां जेटपॅचर मशिनाच्या आदारान पुरयलीं. तातूंतलें दरेक फोंडकुलाचेर सरासरी 23,825 रुपया खर्च जाले, अशें मुख्यमंत्री डॉ. प्रमोद सावंत हांणी विधानसभेंतल्या लेखी प्रस्नाक दिल्ले जापेंत सादर केल्ले आंकडेवारींतल्यान उक्तें जालां.
विरोधी पक्ष फुडारी युरी आलेमांव हांणी हे संबंदांतलो प्रस्न विचारिल्लो. मुख्यमत्री डॉ. सावंत हांणी ह्या प्रस्नाक दिल्ले जापेंत 2022-23, 2023-24 आनी 2024-25 ह्या तीन वर्सांची आंकडेवारी सादर केल्या. ह्या काळांत उत्तर गोंयांतलीं 9,388 आनी दक्षीण गोंयांतलीं 5,357 अशीं वट्ट 14,745 फोंडकुलां जेटपॅचर मशिनाच्या आदारान पुरयल्यांत. उत्तर गोंयांतल्या फोंडकुलांचेर सुमार 22.77 कोटी आनी दक्षीण गोंयांतल्या फोंडकुलांचेर सुमार 12.36 कोटीं रुपया खर्च जाल्ल्याचें आंकडेवारींतल्यान दिसून येता. मजगतीं, निलेश काब्राल भौशीक बांदकाम मंत्री आसतना तांणी जेटपॅचराच्या आदारान दोनूय जिल्ह्यांतल्या रस्त्यां वयलीं फोंडकुलां पुरोवपाची मोहीम हातांत घेतिल्ली. हाचे वयल्यान विरोधकांनी सरकाराचेर टिका केली. फाटल्या विधानसभा अधिवेशनांत आमदार विजय सरदेसाय हांणीय ह्या विशया वयल्यान मुख्यमंत्र्यांचेर टिका केल्ली.
एकूय कंत्राटदार काळे वळेरेंत ना
रस्त्यांचीं बाबत कामां केल्ले कितल्या कंत्राटदारांक फाटल्या पांच वर्सांत काळे वळेरेंत घातल्यात, असोय प्रस्न युरी आलेमांव हांणी विचारिल्लो. ताचेर एकाय कंत्राटदाराक काळे वळेरेंत घालूंक ना, अशी जाप मुख्यमंत्री डॉ.प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
