भांगरभूंय | प्रतिनिधी
आमी सगळेच मोबायल फोन वापरतात. ह्या मोबायलांत सिम कार्ड आसप खूब गरजेचें. ह्या सिम कार्डाच्या आदारान तुमकां तुमचो हक्काचो फोन नंबर मेळटा. तशेंच सिम कार्डाच्या आदारान वेगवेगळ्या कंपनीं कडल्यान मोबायल रिचार्ज करून सोशल मिडियाचो पुराय आनंद घेवंक मेळटा. कांय जाण एक वा चड सिम कार्ड वापरतात. सरकार 1 डिसेंबर सावन सिम कार्ड खरेदी करपा खातीर नवे नेम चालीक लायतले. सुरवेक हे नेम 1 ऑक्टोबर सावन चालीक लावपाचे आशिल्ले. पूण ताका दोन म्हयन्यांची मुजत वाड दिल्ली.
तुमी नवे सिम कार्ड घेवपाचे आसल्यार वा तुमचे पोरणे सिम बंद करपाचे आसल्यार तुमकां सकयल दिल्ले नेम खबर आसप खूब म्हत्वाचें.
१. सिम विक्रेत्याचे व्हेरिफिकेशन जातले
नव्या सिम कार्डाच्या नेमा प्रमाण सिम विकपी सगल्या विक्रेत्यांक व्हेरिफिकेशन करप सक्तीचें आसतलें. तशेंच विक्रेत्यांक सिम विक्री खातीर नोंदणी करप गरजेचें. सिम विकपी खंयच्याय वेपाऱ्याचें पुलिस सत्यापन करपाची जापसालदारकी दूरसंचार संचालकांचेर आसतली. नेमांक दुर्लक्ष केल्यार 10 लाख रुपया दंड भरचो पडूं येता. वेपाऱ्यांच्या व्हेरिफिकेशना खातीर 12 म्हयन्यांचो वेळ दिला.
२. डेमोग्राफिक डेटा एकठांय करतले
गिरायकाक ताच्या पोरण्या नंबराचेर सिम कार्ड मेळोवपाचें आसल्यार ताचें आधार कार्ड स्कॅन करून ताचो डेमोग्राफिक डेटा एकठांय करप सक्तीचें आसतलें.
३. सिम कार्ड बंद करपाचो हो नेम
नव्या नेमा प्रमाण वापरप्यांक सिम कार्ड व्हड प्रमाणांत दिवचे नात. तशेंच सिम कार्ड बंद केल्या उपरांत 90 दिसांच्या काळा उपरांत सिम कार्ड घेवपाक येवपी हेर वापरप्यांक ते सिम कार्ड लागू जातले.
४. जायतीं सिम कार्डां विकतीं घेवप:
नव्या नेमा प्रमाण सिम कार्ड व्हड प्रमाणांत जारी करचे नात. पूण तांकां सिम कार्डां चड प्रमाणात घेवपाचीं आसल्यार गिरायकांक बिजनेस कलेक्शन घेवचें पडटले. तशेंच वापरप्याक एका आयडीचेर फकत णव सिम कार्ड मेळटले.
५. दंड:
नव्या सिम कार्ड नेमा प्रमाण सिम कार्ड विकपी सगल्या विक्रेत्यांक 30 नोव्हेंबर मेरेन नोंदणी करची पडटली. ह्या नेमाचें उल्लंघन केल्यार 10 लाख रुपया मेरेन दंड भरचो पडूं शकता.
फटीचे सिम कार्डाक लागून जावपी घोटाळे आनी फटवणूक आडावपा खातीर केंद्र सरकारान हो निर्णय घेतला. देखूनच नेम खरपणान पाळटले. सिम विकपी वा विकतें घेवपी गिरायकांनी नेमाचें उल्लंघन केल्यार जापसालदार मनशाक दंड भरचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
