1 जूनाक दक्षीणेंत कांय कडेन वीज खंडीत
भांगरभूंय | प्रतिनिधी
मडगांव: दक्षीण गोंयच्या शेल्डे आनी कुंकळ्ळीच्या वीज उपकेंद्र आनी 220 केव्ही आंतरराज्य आनी राज्या भितरल्या वीज लायनीच्या देखरेखीच्या कामाक लागून 1 जून सकाळीं 7 ते दनपारां 3 मेरेन वीज पुरवण खंडीत आसतली.
वीज खातें दक्षीण गोंयांतल्या वीज लायनींचे देखरेखीचें आनी दुरुस्तीचें काम करतलें. शेल्डे आनी कुंकळ्ळी हांगाच्या एक्स्ट्रा हाय व्होल्टेज (ईएचव्ही) उपकेंद्रांचेर देखरेखीचें काम आनी 220 केव्ही आंतरराज्य आनी राज्या भितरल्या वीज लायनींच्या देखरेखीच्या कामां खातीर आयतारा, 1 जून 2025 दिसा सकाळीं 7 ते दनपारां 3 मेरेन वर्सुकी देखरेख आनी दुरुस्ती कार्यावळी खाला वीज पुरवण बंद दवरपाचो निर्णय वीज विभागान घेतला. देखून ह्या काळांत काणकोणां, साश्टी, सांग्यार, केपें तालुक्या सयत धारबांदोड्यां तालुक्याच्या किर्लपाल- दाबळ, शिगांव, कुळें, मोलें आनी फोंडें तालुक्याच्या पंचवाडी पंचायत वाठारांत वीज पुरवण बांद आसतली.
मजगतीं, ह्या देखरेखीच्या कामां वेळार राय, कुडतरी, लोटली, मकाजान आनी वेर्णा, माजोर्डा आनी मुरगांव तालुक्याच्या वाठारांनी वीज पुरवण आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
