‘ॲपस्टीन फायल्स’ त्सुनामी

भांगरभूंय | प्रतिनिधी

ॲपस्टीनच्या आनीक 30 लाख दस्तावेजांक अजून हात लायिल्लो ना. तातूंतल्यान आनीक कितल्या कर्मदळिद्र्यांची भयंकर पापां जगजाहीर जातलीं देव जाणा.

जेफ्री अॅपस्टीन वा अॅपस्टायन एक हजार परस चड बायलो आनी चड करून ल्हान पिरायेच्या चलयांची तस्करी करपी नावाडगो दलाल. जगांतले सद्याचे- आदले राजकारणी, कॉर्पोरेट्स, कलाकार, तंत्रज्ञ आनी गिरेस्तांच्या लैंगीक सुखा खातीर तो तांकां (चलयांक) आपल्या जुंव्या वयल्या बंगल्यांत, प्रायव्हेट जेटांत वा गिरायकाच्या नाम्यार जबरदस्तीन धाडटालो. जगांतल्या गिरेस्त, बळीश्ट राजकारण्यां वांगडा घसट, संबद वाडत गेले तशे ताणें ‘राजकी फिक्सर’ च्या भुमिकेंत दलाली सुरू केली.
जेफ्री कडेन डिग्री नाशिल्ली तरीय 1974 वर्सा न्यू यॉर्कांत प्रतिश्ठीत उच्चभ्रू शाळेंत गणित आनी पदार्थ विज्ञानाचो शिक्षक जालो. ताका हांगां अमेरिकन गुप्तहेर संस्थेत पद भुशयिल्ल्या डॉनाल्ड बार हाणें मजत केली. शाळेंत गिरेस्त घरांतल्या चलयां कडेन जेफ्रीचे संबद आयले. ल्हान पिरायेच्या चलयांची तस्करी करपाची कल्पना ताका थंय सुचली आसतली. त्याच डॉनाल्ड बारान “एकाधिकारशहानी लैंगीक गुलामीचेर आदारित चलयिल्लो समाज” संकल्पनेचेर पुस्तक बरोवप हेंवूय दुबाव घेवपा सारकें. ह्याच बाराचो पूत बिल बार अमेरिकेचो एटर्नी जनरल पदाचेर आशिल्लो आनी ताचेय जेफ्री वांगडा लागींचे संबंद आशिल्ले.
दोन वर्सा उपरांत अर्थवेवस्थेचे मुळावें शिक्षण नासतना फकत स्कुलांतल्या एका विद्यार्थाच्या पालकाच्या आदारान जेफ्री अमेरिकेंतले अर्थिक उलाढालींचे केंद्र वॉलस्ट्रीटार पावलो. देशांत कर चुकोवन दुडू बेकायदेशीरपणान परदेशांतल्या कर आस्रयस्थानांत कशे पावयतात हें ताणें लागींच्यान अभ्यासलें.
ताचे उपरांत शस्रांची बेकायदा कबलाती (ब्लॅक मार्केट), दलालींतूय ताणें लक्ष घालें. उपरांत 1987 वर्सा स्टीवन हॉफनबर्गा वांगडा फटींगपणाची (पोंझी) स्कीम चलोवन गुंतवणूकदारांक $45 कोटींची तोपी घाली. स्कीम सगळी जेफ्रीची आशिल्ली, पूण 20 वर्सांचे बंदखणींत मात हॉफनबर्ग गेलो. तपास यंत्रणाक खंयच जेफ्रीच्यो पावलखुणो मेळ्ळ्यो नात, कारण शिटूकसाणेन ताणें त्यो दवरल्यो नात. 1987 वर्सा जेफ्रीचो संबंद इन्शुरन्स कारोबारी अब्जाधीश लेस्ली वेक्सनरा कडेन जालो. ताची फाटभूंय खबर नासतना लेस्लीन आपल्या सगळ्या धंद्याची पावर ऑफ एटर्नी जेफ्रीक दिली. अलिशान बंगलोय ताच्या नांवार केलो. जेफ्रीन बंगल्यांत लिपिल्ले कॅमरे बसोवन तरणाट्या चलयांक मॉडेलिंगाची कंत्राटां दिवपाक सुरवात केली. जेफ्रीन आपलो दुडू लुटलो हे वेक्सनरान गेल्ले सप्तकांत संसदीय समितीच्या चवकशींत मान्य केलें. 1990 च्या काळांत जेफ्रीची वळख ब्रिटीश मीडिया मुघल रॉबर्ट मेक्सवेला वांगडा जाली. ताणें जेफ्रीक इझ्रायली गुप्तचर एजन्सी मोसादच्या नेटवर्कां लागीं संपर्क करून दिले. इझ्रायलचो आदलो प्रधानमंत्री यहुद बराक अॅपस्टीन फायलींत नमूद आसा. वर्स उपरांत मॅक्सवेल संशयास्पद रितीन आपले खाजगी बोटी वयल्यान उदकांत पडून सोंपलो आनी ताची धूव घिसलेन मॅक्सवेल जेफ्रीची पार्टनर जाली. बापायच्या लिस्टांतल्या राजेशाही, राजकारणी, शास्त्रज्ञ, अब्जाधीशांच्या उच्चभ्रू पार्ट्यांत सहभागी जावन तिणें जेफ्रीचे नेटवर्क वाडयलें. हांगा सावन पद्दतशीरपणान अल्पवयीन चलयांक भरती करप आनी तांकां गिरेस्त गिरायकां कडेन धाडप व्हड प्रमाणांत सुरू जालें.
जेफ्री आपले मॅनहटन, पाम बिच आनी न्यू मॅक्सिकोंतलीं घरां, कॅमेरे आनी आवाज रेकॉर्ड करपाचे यंत्रणेन सुसज्ज केलीं आनी फामाद व्यक्तिमत्वांचे काळे कारनामे भविश्यांत तांची अर्थिक आनी राजकी ब्लॅकमेल करपाच्या उद्देशान रॅकार्ड करून फायली तयार करपाक सुरवात केली. 1993 ते 95 अमेरिकन राष्ट्राध्यक्ष क्लिंटनच्या काळांत जेफ्रीच्यो व्हायट हावस भेटी सुरू जाल्यो. वांगडा बायलोय आसताल्यो. खंयचीय सुरक्षा तांका थांबय नाशिल्ली, चवकशी करनाशिल्ली. व्हायट हावस कर्मचारी मोनिका लेवेन्स्की वांगडाय क्लिंटनान लैंगीक चाळे व्हायट हावसांतूच केल्ले.
वर्स 2000 आसपास जेफ्रीन भविष्य घडोवपी तंत्रज्ञ बील गेट्स, सर्गे बीन हांकां गळाक लायले. तो स्वताय बुद्धीजिवी आशिल्ले वरी वावुरपाक लागलो. नॉबेल विजेत्यांचीं स्नेहसंमेलनां, प्रितीभोज घडोवन हाडपाक लागलो.
वर्स 2008 पावसर जेफ्रीच्या कुकर्मांक वाचा फुटपाक सुरू जाली. ताणें 36 चलयां आड केल्ल्या गुन्यांवाचे पुरावे फेडरल अभियोक्तांच्या हातांत लागले आनी 54 पानी आरोपपत्र तयार जालें. केस नितळ आसली तरी जेफ्री आपल्या राजकी संबंदाक लागून सवाय भितर सुटलो. जेफ्री अॅपस्टीनान 13 म्हयन्यांची बंदखण भोगली खरी, पूण सगळे तरेचीं सुखां, सुटयांचो फायदो घेवन. 2019 वर्सा ताका हेर लैंगीक तस्करी प्रकरणांत परतून अटक जाली. ताका न्यायालयांत उबे करचे आदीं 10 ऑगस्ट 2019 चे रातीं जेफ्री बंदखणींत गोळ घेतिल्ले स्थितींत मेळ्ळो. ताचे जबानींतल्यान उच्चभ्रू, गिरेस्त, राजकारण्यांचीं नांवां मुखार येतलीं हाची उत्सुकता आशिल्ली, त्या आदींच तो सोंपलो- चड करून सोंपयलो.
बंदखणींत त्या वेळार दर अर्दवरान लक्ष दवरपी सुरक्षाकर्मींची गैरहाजिरी, त्याच काळांत थंयचे कॅमेरे निकामी आसप हो योगायोग नासतलो. जेफ्रीच्या वटेन शवविच्छेदनाच्या वेळार हजर आशिल्ल्या दोतोर मायकेल बाडेनान जेफ्रीच्या स्वासनलिकांचेर ज्या जाग्यांनी आनी जे तरेचो दबाव दिसलो तो गोळ घेतिल्लो जाल्यार तसो दिसूंक शकना, अशें मत मांडलें. अमेरिकेंतल्या सर्व्हेंत 44% लोक ताचो खून जालो असो दुबाव घेतात तर फकत 16% आत्महत्या केली अशें मानतात.
ताच्या मरणा उपरांत ताचे आड लागिल्ले सगले आरोप निरस्त जाले आनी ताच्या कृष्णकृत्यांतली वांगडी घिसलेन मॅक्सवेल हिका फकत पांच प्रकरणांत न्यायालयान गुन्यांवकारी थारावन 2021 वर्सा बंदखणींत धाडली. जेफ्रीचो आनीक एक सहकारी फ्रेंच ज्यां ल्यूक ब्रुनेलाक फ्रेंच तपास यंत्रणेन 2020 वर्सा अटक केल्ली. ताणेंय आत्महत्त्या केली.
एपस्टीन प्रकरणांतल्या पीडितांक न्याय मेळोवन दितलो अशें आश्वासन ट्रंपान आपल्या वेंचणूक प्रचारसभांत अमेरिकन जनतेक दिल्लें खरें, पूण दस्तावेजांत ट्रंपाचें नांव चाळीस हजार मायज वेळा आयिल्लें आसतना आनी हाॅवार्ड लुटनीक (वाणिज्य मंत्री), रॉबर्ट कॅनेडी (भलायकी मंत्री), जॉन फॅलान (नौदल मंत्री), स्टीव बॅनन (वरिश्ठ सल्लागार), अलेक्स अकोस्टा (आदलो कामगार मंत्री), स्टीफन फेनबर्ग (उपसंरक्षण मंत्री) आनी फॅडरल रिझर्व अध्यक्षपदार नामांकन केला तो केविन वार्श ह्या सगळ्यांचीं नांवांय दास्तावेजांत आशिल्ल्यान एटर्नी जनरल पॅम बोंडी आनी FBI डायरेक्टर कॅश पटेल ही ट्रंपाची खास निश्ठावन ट्रंपाक आनी मंत्र्याक वाटावपाचो यत्न करतना दिसतात. लक्ष्य फकत विरोधी डॅमोक्रेटीक पक्षाचे आदले राष्ट्राध्यक्ष बील क्लिंटन आनी घरकान्नीक केलां. एपस्टीन फायलींतले 30 लाख दस्तावेज उजवाडाक हाडल्यात खरे, पूण अमेरिकेंतले सत्तेंतले, गिरेस्त, तंत्रज्ञ हांचीं नांवां ई- मेल आनी दस्तावेजांत काळे लावन लिपयल्लीं दिसतात आनी पीडितांचीं नांवां आसा तशीं दवरून जाहीर केल्यांत.
बंदखणींत खास्त भोगपी गुन्यांवकार घिसलेन मॅक्सवेलाक मात ट्रंपान त्रासदायक फ्ल़ॉरिडा बंदखणींतल्यान बऱ्यांतल्यो सुखसोयी आशिल्ल्या टेक्सासच्या बंदखणींत स्थलांतर करून एका तरेन एपस्टीन फायल प्रकरणांतली सरकारची ‘गंभीरताय’ दाखोवन दिली. मुखार ट्रंप सत्ता सोडचे आदीं आपले विशेश अधिकार वापरून तिची सुटका करतलो हेंवूय निश्चीत.
सद्या ट्रंप परग्रहवासी, उडत्यो तबकड्यांच्यो सुरक्षा संस्थे कडल्यो फायली जनते खातीर उकत्यो करून एपस्टायना वयलो फोकस कुशीन काडपाच्या यत्नांत दिसता.
परदेशांतले राजनेते, मंत्री, शाही परिवारांतले… हांची नांवां विशेश राजकी उद्देशान निवडक रितीन अजेंडा नुसार जाहीर केल्यांत अशें दिसता. युरोप, युकेंत दस्तावेजांत उल्लेखीतांक कायद्या प्रमाण आरोपी सारके वागयतात. शेकड्यानी महनीय व्यक्तींचे राजीनामे आनी चवकशी सत्र सुरू आसा. युकेंत मजूर सत्तापक्षांतलो एक प्रमुख नेतो पीटर मेंडलसनाक अमेरिकेंतल्या राजदूत पदा वयल्यान आनी उपरांत पक्ष वांगडी पदांतल्यान काडून उडयला. ब्रिटीश राजा चार्ल्साचो भाव एंड्र्यू माउंटबेटन- विंडसराचे (आदलो राजकुमार एंड्र्यू) राजदरबारांतले स्थान, राजवाडो, पदव्यो काडून घेतल्यात. पदाचो दुरूपयोग करून देशाची अर्थव्यवस्था, गुंतवणूक विशीं संवेदनशील गुप्त दास्तावेज अॅपस्टीनाक दिले ह्या आरोपाखाला दोगांच्योय चवकश्यो चालू आसात. गेल्ले सप्तकांत युकेंत पुलिसांनी ह्या प्रकरणांत राजा चार्ल्साक कळीत करनासतना ताचो भाव एंड्र्यूक ताच्या 66 व्या वाडदिसा अटक करून चवकशे खातीर व्हेलो. “समाजांत कायदो सगळ्यांक समान, कायद्या वयर कोणूय आसूंक फावना.” हे थंयच्या प्रधानमंत्र्यांच्या विधानाक चार्ल्सानूय तेंको दिला.
फामाद भारतीयांचोय उल्लेख दस्तावेजांत सांपडला. आमचे पेट्रोलियम आनी उर्जामंत्री हरदीप सिंग पुरी हांणी 2014 उपरांत जेफ्रीची तीन- चार फावट भेट घेतल्या हे कबूल केलां. साठ मायज ई- मेलींचे आदान प्रदान जालां, तातूंत भारताची अर्थवेवस्था, व्यापार, डिजिटल क्षेत्रांत अमेरिकन गुंतवणुकी संबदीत चर्चा जाल्ली दिसता. ती चिंतेची बाब. “जेफ्री बाल लैंगिक गुन्यांवकार आशिल्लो हे आपल्याक खबर आशिल्लें, पूण आपलो वेव्हार ताचे वांगडा फकत राजकी बाबतींत आशिल्लो” अशी सारवासारव करपाचो यत्न पुरीन केला. चरित्रहीन, नितिभ्रश्ट, घाणयाऱ्या गुन्यांवकाराची राजकी बाबतींत मजत घेवप आनी हे कृतीच्या समर्थनांत प्रतिवाद देशाचो एक मंत्री करता तेन्ना थंय बौद्धीक दिवाळखोरी दिसता.
2017 ते 2019 मदीं रिलायन्स ग्रुप इन्फ्राश्ट्रक्चर आनी पॉवर सॅक्टराचो अध्यक्ष अनिल अंबानीन जेफ्री वांगडा ई- मेलींत सुरक्षा, शस्त्र कबलाती, इझ्रायली गुप्तहेर यंत्रणा, भारतांत अमेरिकन दुताची निवड, प्रधानमंत्र्याची अमेरिका भेट हे विशीं चर्चा केल्या. मार्च 2017 आदीं जेफ्रीन ‘अंबानी अॅण्ड सन्स’ आनी ‘अंबानी वर्सेस अंबानी’ ही पुस्तकां मागोवन अंबानीची म्हायती जाणून घेतल्या अशें दिसता. देशाच्या सुरक्षा शिश्टमंडळा वांगडा अंबानी पॅरिस, मॉस्कोंत गेल्लो. ताचे कंपनीची देशांतल्या रफेल लढावू विमानां खातीर सुटे भाग पुरवण करपाची कबलात आसा. तेन्ना ताणें एपस्टीन सारकिल्ल्या कडेन देशाच्या सुरक्षे संबंदीत विशयांची चर्चा करप ही गंभीर गजाल आसा.
जेफ्रीच्या फायलींत नांव आयिल्ल्या आपल्या आदल्या प्रधानामंत्र्यांआड गुन्यांवाचे आरोप लावपी नॉर्वे पयलो देश थारला. अॅपस्टीनच्या तालार नाचपी, ताचे वांगडा स्वदेशाची अर्थवेवस्था, विकास दर, गुंतवणुको, देश सुरक्षेच्या संवेदनशील मुद्द्यांचेर चर्चा करपी देशांतले मंत्री, राजकारणी, कॉर्पोरेट हांची कायदेशीर चवकशी जावप योग्य. स्वताचेर लागिल्ले कलंक पुसून उडोवपा खातीर ताणीय स्वता जावन चवकशेक फुडो करपाची तयारी दाखोवपाक जाय. चारित्र्याचेर आरोप लागिल्ले तेन्ना सीतेन अग्निदीव्य केल्लें. अॅपस्टीनच्या आनीक 30 लाख दस्तावेजांक अजून हात लायिल्लो ना. तातूंतल्यान आनीक कितल्या कर्मदळिद्र्यांची भयंकर पापां जगजाहीर जातलीं देव जाणा.

दीपक लाड
पर्वरी