भांगरभूंय | प्रतिनिधी
पणजी: गोंय सरकाराच्या नुस्तेंमारी संचालनालया वतीन ९ ते ११ जानेवारी २०२६ मेरेन कांपाला वयल्या दयानंद बांदोडकर मैदानाचेर अक्वा गोवा मेगा फिश महोत्सवाचें आयोजन करतले. गोंयचे विद्यार्थी आनी सामान्य लोकांक नुस्तेंमारी वेवसाया संबंदी शिक्षणीक आनी तंत्रज्ञानाचो अणभव करून दिवपा खातीर दर वर्सा विशेश पद्दतीन हो महोत्सव आयोजीत करतात. महोत्सवांत वेगवेगळ्या जातींचें नुस्तें आनी सागरी जीवांवळींच्या प्रदर्शना सयत विंगड विंगड सर्तीं, खाणां-जेवणांचे स्टॉल्स, लोकनाच आनी हेर करमणूक कार्यक्रमांचे आयोजन करतले.
नुस्तेंमारी वेवसायिकांक सरकारी येवजण्यों आनी नुस्तेंमारी वेवसायांतल्या आधुनीक तंत्रज्ञानाची म्हायती करून दिवप तशेंच युवकांक ह्या वेवसायाकडेन आकर्शीत करप हो अक्वा गोवा मेगा फिश महोत्सवाचो उद्देश आसा. गोंय राज्य नुस्तेंमारी संस्कृती आनी वेवसायाखातीर फामाद आसून लोकांनी महोत्सवाक भेट दिवन महोत्सव यशस्वी करपाक सहकार्य करचे, अशें नुस्तेंमारी संचालनालयान मागलां.खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
