भांगरभूंय | प्रतिनिधी
पणजी : मुख्यमंत्री प्रमोद सावंत हांणी आयज ८ ते १३ जानेवारी मजगतीं राज्यांत आंतरराष्ट्रीय पर्पल फेस्ताचें आयोजन येसस्वीपणान करतले, अशी घोशणा केली. ह्या वेळार समाजकल्याण मंत्री सुभाष फळदेसाय, सचीव सुभाष चंद्रा, राज्य दिव्यांगजन आयुक्त गुरुप्रसाद पावसकार आनी सचीव ताहा हाजिक, तशेंच दिव्यांगा खातीर काम करपी मानेस्त हाजीर आशिल्ले.
फाटल्या वर्सा दिव्यांगा खातीर आयोजीत केल्ल्या पर्पल फेस्ताक पुराय देशांतल्यान बरो प्रतिसाद मेळिल्लो. तातुंतल्यान उर्बा घेवन आमी अंदूं हो फेस्टीव्हल आंतरराष्ट्रीय पांवड्यार करपाचो थारायलां. हो फेस्टीव्हल आयोजीत करप गोंय सरकारा खातीर अभिमानाची गजाल आशिल्ल्याचें मुख्यमंत्र्यान फुडें सांगलें.
हो फेस्टीव्हल संवसारीक पांवड्यावेल्या लोकां खातीर म्हत्वाची माची थारता. फेस्टीव्हला वरवीं गोंय सरकार दिव्यांगां खातीर बरो उपक्रम चालीक लायता. संवसारभरांतल्या दिव्यांगांनी तशेंच तांचे खातीर काम करपी संस्थांनी हे संदीचो लाव घेवपाचो उलो मुख्यमंत्र्यान ह्या वेळार मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
