भांगरभूंय | प्रतिनिधी
पणजी : कॉंग्रेसीचे आदले प्रदेशाध्यक्ष गिरीश चोडणकार हांणी ८ आमदारांच्या अपात्रते संबंदी विधानसभा सभापतींच्या आदेशाक सर्वोच्च न्यायालयांत विशेश याचिके वरवीं आव्हान दिलां. फाल्यां, मंगळारा १९ ऑगस्टाक हें प्रकरण सुनावणे खातीर येतलें. सरन्यायाधीश भूषण गवई, न्यायमुर्ती सुर्यकांत आनी न्यायमुर्ती विक्रम नाथ हांच्या खंडपीठा मुखार ही सुनावणी जातली.
७ मार्चाक हे विशेश याचिकेचेर सुनावणी जाल्ली. तेन्ना न्यायालयान सभापतीं सयत आठ आमदारांक जाप दाखल करपा खातीर नोटीसो दिल्ल्यो. फुडले तात्पुरते सुनावणेची तारीख २९ एप्रिलाक दिल्ली. ते सुनावणेंत कसलेचो तरेचो निर्णय लागूंक नाशिल्ल्यान २२ जुलय ही फुडली तारीख थारायल्ली. मात त्या दिसाय निश्कर्श लागूंक नाशिल्ल्यान आतां सुनावणी १९ ऑगस्टाक जातली. तशेंच चोडणकार हांणी दखल केल्ले ह्यान पयलींचे याचिके वांगडा ही नवी याचिका एकठांय करपाचे निर्देश सर्वोच्च न्यायालयान दिल्यात.
ह्यान पयलीं चोडणकार हांणी बाबू कंवळेकार हांचे सयत १० आमदारां आड (फाटलें सरकाराच्या कार्यकाळांतलें प्रकरण) अशीच याचिका दाखल केल्ली. ज्या पक्षाच्या चिन्नाचेर आमदार निवडून आयिल्ले, त्या मूळ पक्षाचे संमती बगर फकत दोन तृतियांश बहुमतांच्या आधाराचेर विधिमंडळ पक्षाचे दुसर्या पक्षांत विलिनीकरण हें धाव्या अनुसूचीप्रमाण वैध थारपाक शकता काय? असो मूळ मुद्दो ह्या दोनूय प्रकरणांत मांडलो.
सप्टेंबर २०२२ वर्सा कॉंग्रेसचे दिगंबर कामत, आलेक्स सिक्वेरा, संकल्प आमोणकार, रुडॉल्फ फर्नांडीस, मायकल लोबो, डिलायला लोबो, केदार नायक आनी राजेश फळदेसाय ह्या आठ आमदारांनी कॉंग्रेसींतल्यान वेगळो गट स्थापन करून भाजपांत प्रवेश केल्लो. ह्याच प्रकरणावेल्यान फाल्यांचे सुनावणेक म्हत्व आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
