भांगरभूंय | प्रतिनिधी
फुडाराक धर्तरी कशी आसतली हाची उमेद वा विचार अंतराळ संशोधक तशेंच सादारण मनशांक आसता. कांय वर्सांनी धर्तरी नश्ट जातली अशीं उलोवपां सदांच चर्चेत आसता. पूण ८०० कोटी वर्सां उपरांत धर्तरी कशी आसूं येता हाचो अदमास कांय खगोलशास्त्रज्ञांनी काडला. ते खातीर संशोधकांनी एक बाह्यग्रह सोदून काडला आनी ह्या संशोधकांनी ८०० कोटी वर्सां उपरांत धर्तरी अशी आसूं येता अशें तर्क लायलां.
सॅन दिएगोच्या कॅलिफोर्निया विद्यापिठांतल्या खगोलशास्त्रज्ञांनी हे विशीं संशोधन केलें. ह्या विद्यापिठाचे खगोलशास्त्रज्ञ केमिंग झांग हांणी विज्ञान पंगडाचें फुडारपण केलें. हें संशोधन ‘नेचर एस्ट्रोनॉमी’ ह्या नेमाळ्यांत उजवाडाक आयलां.
फुडाराच्या धर्तरी विशींचे संशोधन कितें?
८०० कोटी वर्सां उपरांत धर्तरी कशी आसतली हाचे उत्सूकतायेक लागून खगोलशास्त्रज्ञांनी एक बाह्यग्रह सोदून काडलो. पयसुल्ल्या गिऱ्याचो सोद घेवन फुडाराक धर्तरी कशी दिसूं येता हाचे एक वेगळेंच रुप सोदून काडपाक शास्त्रज्ञांक येस मेळ्ळे. ‘केएमटी-२०२०-बीएलजी-०४१४’ अशें नांव दिल्लो हो गिरो धर्तरेसावन ४००० उजवाड वर्सां पयस आसा. हो गिरो धर्तरेपरस दुप्पट आकाराचो आसून तो श्वेतबटू नखेत्राभोंवतणी (व्हाइट ड्वार्फ) घुंवता. मुळांतूच हो आतां नखेत्र उरुंक ना पूण ताचे लासिल्ले अवशेश आसात. ५०० कोटी वर्सां उपरांत आमचो सुर्यय जळपी अवशेश जातलो असो अदमास शास्त्रज्ञांनी सांगला. ताचे उपरांत ८०० कोटी वर्सां उपरांत धर्तरीय ह्या बाह्यग्रहाभशेन दिसतली आनी ती सूर्याच्या अवशेशां भोंवतणी घुंवतली अशें खगोलशास्त्रज्ञांनी सांगलें.
कांय अब्ज वर्सां उपरांत सुर्य कसो आसतलो?
खगोलशास्त्रज्ञांनी ‘केएमटी-२०२०-बीएलजी-०४१४’ हो गिरो जळपी श्वेतबटू भोंवतणीं भोंवता असो सोद लायलो. ५०० कोटी वर्सां उपरांत सुर्याचीय हीच परिस्थिती येतली असो संशोधकांनी अदमास काडला. पूण अशें जावचे पयलीं सूर्य तांबड्या सुपरजायंट नखेत्रांत रुपांतरीत जातलो आनी तो लागींच्या गिऱ्यांक व्यापून उडयतलो. आमच्या सौर मंडलांतलो बुध हो सूर्याच्या सगळ्यांत लागींचो गिरो. रुपांतरीत जाल्लो महाकाय सूर्य पयलीं बुध गिळटलो. ते उपरांत शुक्र आनी मंगळूय ताच्या भक्ष्या जाग्यार येवंक शकतात. सूर्यासावन धर्तरेचें अंतर सुमार १४,९५,९७,८९० किमी आसा. पूण धर्तरीय ह्या व्हड महाकाय सूर्याच्या भक्ष्या जाग्यार बळी पडूंक शकता. पूण सूर्यान धर्तरेक गिळ्ळो ना जाल्यार धर्तरी ‘केएमटी-२०२०-बीएलजी-०४१४’ गिऱ्या सारकी जातली आनी ती ह्या जळपी सुर्याच्या भोंवतणी घुंवतली असो अदमास शास्त्रज्ञांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
