भांगरभूंय | प्रतिनिधी
नवी दिल्ली, खबरां संस्था: पहलगाम आतंकवादी हल्ल्या उपरांत केंद्र सरकारान पाकिस्तानी नागरिकांक भारत सोडपाचे आदेश जारी केल्ले. २४ ते २९ एप्रिलाक सांजेवेळार ५ वरां मेरेन ७८६ पाकिस्तानी अटारी-वाघा शिमेवेल्यान परतले.
पीटीआयच्या वृत्ता प्रमाण, २८ एप्रील मेरेन एक हजारां परस चड भारतीय पाकिस्तानांतल्यान घरा परतल्यात. सांजेवेळार ५ वरां उपरांत आयिल्ल्या लोकांक परत धाडले. तांकां शीम हुपपाक मेळूंक ना. २९ एप्रीलाक पाकिस्तानी नागरिकांक दिल्ल्या वैजकी व्हिसाची वैधताय सोंपली.
केंद्र सरकारान २७ एप्रीलाक आदेश जारी केल्लो काय, जे पाकिस्तानी नागरीक निमाणे मुजतींत भारत सोडचे ना, तांकां अटक करतले आनी तांचेर गुन्यांव दाखल करतले. तांकां तीन वर्सांचीं बंदखण वा तीन लाख रुपया वा दोनूय ख्यास्त जातल्यो.
२५ एप्रीलाक भारत सरकारान पाकिस्तानी नागरिकांक देश सोडपाचो आदेश दिवपी नोटीस जारी केल्ली. हातूंत, दीर्घकालीन, राजनैतिक आनी अधिकृत व्हिसा सोडल्यार पाकिस्तानी नागरिकांक दिवपी सगले तरेचे व्हिसा २७ एप्रील सावन रद्द केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
