भांगरभूंय | प्रतिनिधी
नवी दिल्ली, खबरां संस्था: केंद्र सरकारान २६ नोव्हेंबराक ७५ व्या संविधान दिसा निमतान बंदखणींत आशिल्ल्या कैद्यां खातीर विशेश मोहीम चालीक लायल्या. तांकां हालींच लागू जाल्ले भारतीय न्याय संहिते प्रमाण जामीन दितले. नव्या कायद्याच्या कलम ४७९ खाला कैद्यान आपले आड आशिल्ल्या आरोपां खातीर अर्द्या परस चड ख्यास्त भोगल्या जाल्यार तो जामीन मेळपाक पात्र थारता. पयलेच फावट गुन्यांव करून बंदखण भोगिल्ल्या कैद्यान संभाव्य शिक्षेच्या तृतीयांश काळ बंदखण भोगल्या आसत जाल्यार ताकाय जामिनाचो हक्क आसतलो.
गृह मंत्रालयान हे विशीं राज्यांचे सचीव आनी बंदखण प्रशासकां खातीर सुचवण्यो जारी केल्यात. संविधान दिसा निमतान अशा सगळ्या कच्च्या कैद्यांची जामिनाचेर सोडपाक विशेश मोहीम चालीक लावपा खातीर तपशील दिवपाचे निर्देशूय मंत्रालयान दिल्यात. पयल्याच गुन्यांवाचे ख्यास्तीचो एक तृतीयांश काळ बंदखणींत घालयिल्ले २ लाख कैदी आसात. तांकां जामीन दिवपाचे आदेश सुप्रीम कोर्टान २३ ऑगस्टाक दिल्ले. ही तरतूद १ जुलय २०२४ चे आदीं बंदखणींत आशिल्ल्या कैद्याकूय लागू जातली.
स्थिती : बंदखणींत ५.७५ लाख कैदी, ७५% खटले तशेच
देशांतल्या बंदखणींनी सुमार ५.७५ लाख कैदी आसात. हातूंतले ७५% सध्या केशींक तोंड दित आसात. दिल्लीचे तिहार बंदखणीची १० हजार कैद्यांची तांक, पूण थंय १४ हजार कैदी आसात. उत्तर प्रदेशाचे बंदखणींत सगळ्यांत चड ७६ हजार कैदी आसात. उपरांत महाराष्ट्रांत सुमार ६० हजार, बिहारांत ४५ हजार, मध्य प्रदेशांत ३९ हजार आनी बंगालांत ३७ हजार कैदी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
