भांगरभूंय | प्रतिनिधी
पणजी : अंत्योदय अन्न येवजणेची (एएवाय) रेशनकार्डां आशिल्ल्या राज्यांतल्या ११,५५० कुटुंबां मदल्या फाटल्या णव म्हयन्यांत ७,२६२ कुटुंबांनी राज्य सरकाराच्या मुख्यमंत्री एलपीजी गॅस सिलिंडर येवजणेचो लाव घेतला. हाका लागून सरकारान ह्या णव म्हयन्यांत सुमार १.७९ कोटींचो खर्च केल्ल्याची म्हायती नागरी पुरवण संचालक जयंत तारी हांणी बुधवारा दिली.
गॅस सिलिंडराचें दर वाडले उपरांत राज्यांतल्या ‘एएवाय’ रेशनकार्डे आशिल्ल्या कुटुंबांक समाधानी करपा खातीर मुख्यमंत्री एलपीजी गॅस सिलिंडर येवजण सुरू केली. नागरी पुरवण खात्यावरवीं ती चालीक लायल्या. येवजणे वरवीं फाटल्या एप्रील सावन अशा रेशनकार्ड धारकांक दरेका म्हयन्याक सिलिंडराचेर २७५ रुपयांची सबसिडी दितात. ह्या णव म्हयन्यांच्या काळांत ‘एएवाय’ रेशनकार्डां आशिल्ल्या ११,५५० कुटुंबां मदल्या ७,२६२ कुटुंबांनी येवजण्यांचो लाव घेतलो. ताचेर नागरी पुरवण खात्यान सुमार १.७९ कोटी रुपया खर्च केल्ल्याचें तारी हांणी सांगलें.
जागृताय केले उपरांत प्रतिसाद वाडलो
मजगतीं, राज्य सरकाराची मुख्यमंत्री एलपीजी गॅस सिलिंडर येवजण अधिसुचीत जाले उपरांत कांय दिसांनीच केंद्र सरकारान घरगुती सिलिंडराचें दर २०० रुपयांनी उणेञ केल्लें. ‘एएवाय’ रेशनकार्डधारकांक सिलिंडरा फाटल्यान ४७५ रुपयांचो फायदो मेळिल्लो. अशें आसून लेगीत सुरवातेक ‘एएवाय’ रेशनकार्ड धारकांकडल्यान २७५ रुपयांच्या अनुदाना खातीर जाय तसो प्रतिसाद मेळूंक नाशिल्लो. उपरांत खात्यान केल्ले जागृतायेक लागून येवजणेचो प्रतिसाद वाडतूच गेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
