भांगरभूंय | प्रतिनिधी
नवी दिल्ली, खबरां संस्था: देशाचे आदले सॉलिसिटर जनरल हरीश साळवे हांचे सयत ६०० परस चड वरिश्ठ वकिलांनी सरन्यायाधीश डी वाय चंद्रचूड हांकां पत्र बरयलां. न्यायवेवस्था असुरक्षित आसा. राजकी आनी वेवसायीक चेंपणा पसून तिची राखण करपाची गरज आसा अशें तातूंत म्हणलां.
न्यायालयीन अखंडताय दुबळी करपाचो यत्न सुरू आसा अशें वकिलांनी बरयलां. आमी कायदो तिगून दवरपी मनीस. न्यायालया वटेन उबे रावप, अशें आमी मानतात. आतां एकठांय येवन आवाज वाडोवपाचो वेळ आयला. गुप्तपणान हल्लो करपी लोकां आड उलोवपाचो वेळ आयला. न्यायालयां लोकशायेचे खांबे उरचीं हाची आमी खात्री करपाक जाय. ह्या मुद्दाम केल्ल्या हल्ल्याचो तांचेर कसलोच परिणाम जावंक फावना, अशें तांणी पत्रांत म्हणलां.
२६ मार्चाक बरयल्लें पत्र
‘‘आदरणीय सर,
आमी सगळे आमचो व्हडलो हुस्को तुमचे कडेन वांटून घेतात. एक खाशेलो गट न्यायवेवस्थेचेर चेंपण हाडपाचो यत्न करता. हो गट न्यायवेवस्थेचेर प्रभाव घालता आनी आपलो राजकी अजेंडा फुडें व्हरपा खातीर आरोप करून न्यायालयांक बदनाम करपाचो यत्न करता.
तांचे हे कृतीक लागून न्यायवेवस्थेचें खाशेलपण आशिल्लें बरें आनी विस्वासाचें वातावरण इबाडटा. राजकी घडामोडींत चेंपणाचे डाव सामान्य आसात, विशेश म्हळ्यार ज्या प्रकरणांनी राजकारणी भ्रश्टाचाराचो आरोप आसा. हे डाव आपल्या न्यायालयांचें लुकसाण करता आनी लोकशाय रचणुकेक धोको निर्माण करता.
हो खाशेलो पंगड जायत्या तरांनी काम करता. ते आमच्या दरबारांतल्या भांगराळ्या भुतकाळाचो उल्लेख करतात आनी आयच्या घडणुकां कडेन तांची तुळा करतात. निर्णयांचेर प्रभाव घालपा खातीर आनी राजकी फायद्या खातीर न्यायालयांक धोको निर्माण करपा खातीर हीं फकत मुद्दाम केल्लीं विधानां.
कांय वकील दिसाचे राजकारण्यांची केस लडटात आनी रातच्या वेळार प्रसार माध्यमां मुखार वचून उलयतात. तांची ही कृती निर्णयाचेर प्रभाव घालता हें पळोवन अस्वस्थ जावंक जाता. तशेंच बेंच फिक्सिंगचो सिद्धांत ते तयार करतात. ही कृती फकत आमच्या न्यायालयांचो अनादर करपी न्हय तर बदनामी करपीय आसा. हो आमच्या न्यायालयाच्या प्रतिश्ठेचेर हल्लो.
माननीय न्यायाधीशांचेरूय हल्लो सुरू आसा. तांचे विशीं फटींग गजाली सांगपाक लागल्यात. हे इतले सकयल आयल्यात की ते आमच्या न्यायालयांची तुळा कायदो नाशिल्ल्या देशां कडेन करतात. आमचे न्यायवेवस्थेचेर अन्यायी कारवाय करपाचो आरोप करप सुरू आसा.’’
दोन मुद्द्यांचो खाशेलो उल्लेख
१. राजकारण्यांचें दोट्टी चरित्र: राजकारणी कोणाचेरूय भ्रश्टाचाराचो आरोप करतात आनी उपरांत तांकां वाटावपा खातीर न्यायालयांत वतात हें पळोवन अजाप दिसता. न्यायालयाचो निर्णय तांचे वाटेन लागना जाल्यार ते न्यायालयाचेरच टिका करतात आनी मागीर प्रसार माध्यमां मेरेन पावतात. हें दोट्टी चरित्र म्हळ्यार सामान्य मनशांचो आमचे कडेन आशिल्ल्या मानाक धोको आसा.
२. बॅक बिटिंग आनी फटींग म्हायती: कांय जाण सोशल मिडियाचेर आपल्या केसी संबंदीत, न्यायाधीशां विशीं फटींग म्हायती पातळायतात. तांच्या खटल्यांतल्या निर्णयाचेर आपले पद्दतीन चेंपण हाडपा खातीर ते अशें करतात. हें आमच्या न्यायालयांच्या पारदर्शकतेक धोको आनी कायदेशीर तत्वांचेर हल्लो जावन आसा. तांचो वेळूय थारायिल्लो आसता. देशाक वेंचणुकेक तोंड दिवचें पडटा तेन्ना ते अशें करतात. हें आमी २०१८-१९ वर्साय पळयल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
