भांगरभूंय | प्रतिनिधी
नवी दिल्ली, खबरां संस्था : पुराय भारतांत १ जानेवारी २०१६ ते ३१ जानेवारी २०२१ ह्या काळांत ९ हजार ६०० परस चड ल्हान भुरगीं, प्रौढांक चुकीचे तरेन बंदखणींत दवरिल्ल्याचें भिरांकूळ चित्र मुखार आयलां. म्हायती अधिकार कायद्या खाला (आरटीआय) ‘भारतांतले बंदखणींत भुरगीं’ ह्या अभ्यासा खाला ही म्हायती मेळ्ळ्या. कायदेशीर अधिकार संस्था आशिल्ल्या ‘आयप्रोबोनो’न केल्ल्या अभ्यासांतल्यान भारतांतले बाल न्याय वेवस्थेचेर परिणाम करपी गंभीर गजालींचेर उजवाड घाला.
देशांतल्या उण्यांत उण्या ९,६८१ भुरग्यांक बेकायदेशीर रितीन बंदखणींत दवरले. हाचो अर्थ दर वर्सा सरासरी १६०० परस चड भुरग्यांक बंदखणींत दवरतात. जाहीर केल्ल्या आंकड्यांनी बाल न्याय मंडळान (जेजेबी) वळखपी आनी प्रौढ बंदखणींतल्यान बाल घरांत बदली केल्ल्या भुरग्यांचो उल्लेख केला. देशभरांतल्या वट्ट ५७० जिल्लो आनी केंद्रीय बंदखणीं मदल्या २८५ जिल्लो आनी केंद्रीय बंदखणींनी ‘आरटीआय’ वरवीं दिल्ले म्हायतीचेर आदारून हो आंकडो थारायला. देशभरांत ७४९ बंदखणींनी हे विशीं म्हायती मागूंक ना. हातूंत उप बंदखण, बायलांची बंदखण,उक्ती बंदखणे, विशेश बंदखण, बालसुधार घर आनी हेर बंदखणींचो आसपाव आसा. जाल्यार ९ हजार ६८१ मदले फकत येसस्वी तरेन वळखपी आनी हस्तांतरीत जाल्ल्या बंदखणींत सोयर्यांनी, कुटुंबान वा स्वताची वळख करून घेतिल्ल्या भुरग्यांचो हातूंत आसपाव आसा. तशेंच सांगिल्ल्या गुन्यांवांच्या वेळार जे नेण्टे पिरायेचे आशिल्ले त्या सगळ्यांचोच हातूंत आसपाव ना. ज्या राज्यांनी म्हायती दिली थंयचो आंकडो चिंता करपा सारको आसा.
बंदखणींचो आढावो
राज्य बंदखण प्रौढ बंदखणींतल्यान प्रतिसाद भुरग्यांचें स्थलांतर
उत्तर प्रदेश ७१ टक्के २,९१४
बिहार ३४ टक्के १,५१८
महाराष्ट्र ३५ टक्के ३४
हरियाणा ९० टक्के १,६२१
राजस्थान ५१ टक्के १०८
छत्तीसगड ४४ टक्के १५९
झारखंड ६० टक्के १,११५
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
