भांगरभूंय | प्रतिनिधी
पणजी : काणकोणच्या श्री संस्थान गोकर्ण पर्तगाळी जीवोत्तम मठाक ५५० वर्सां पुराय जाल्ल्या निमतान ५५० दिसांनी ५५० कोटी श्रीराम नामजप करपाचें निश्चीत केल्लें. प्रत्यक्षात ५९४ कोटी श्रीराम नामजप पुराय जाले. ह्या नामजपांची नोंद आतां ’वर्ल्ड बुक ऑफ रेकॉर्डस्ांत जाल्या. ‘आशिया वर्ल्ड बुक ऑफ रेकॉर्डस’सहीत इंडिया बुक ऑफ रेकॉर्डसांतूय जाल्या. श्रीमद् विद्याधीश तीर्थ वडेर स्वामी हांणी धर्मसभेंत हाची घोशणा केली.
‘आशिया वर्ल्ड बुक ऑफ रेकॉर्डस’च्या संचालकांनी स्वामीजींच्या नांवार ही नोंद करपाची शिफारस केल्ली. मात, स्वामींनी ही नोंद आपल्या नांवार करपाक नाका अशें सांगलें. श्रीराम नाम जप गौड सारस्वत समाजाच्या समाज भावांनी १२० जप केंद्रां आनी १०४ उपकेंद्रांतल्यान केले. नामजप पुराय करपाचें श्रेय तांकां वता. हांव फकत एक मार्गदर्शक आशिल्ल्याचें स्वामीजींनी स्पश्ट केलें. नोंद करपाची आसल्यार ‘जीएसबी’च्या (गौड सारस्वत ब्राम्हण समाज) नांवार करची, अशी सुचवणी केली. ते प्रमाण तशी नोंद केल्ल्याची म्हायती स्वामींजीनी दिली. हो विक्रम म्हळ्यार एक लौकीक आसा. तुमी केल्लो श्रीराम नामजप ‘वैकुंठ बुक ऑफ रेकॉर्डस्’त नोंद जाला. श्रीरामाच्या पांयां कडेन अर्पण जाल्ल्याचें स्वामींनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
