भांगरभूंय | प्रतिनिधी
पुरी, खबरां संस्था: पुरी शारांतल्या महाप्रभू जगन्नाथ देवळाच्या रत्नभंडारांतलो खजिनो बिरेस्तारा भायर काडलो. ह्या कामा खातीर राज्य सरकारान स्थापन केल्ले उच्च समितीचे ११ वांगडी सकाळीं ९.१५ वरांचेर भितर गेले. थंयच्या दाट कंवचेच्या तीन आनी एका लोखणाचे आल्मारेंत भांगर मेळ्ळे. दोन लाकडाचीं आनी एक लोखणाचें बॉक्सूय थंय आसा. त्या दरेका बॉक्सांनी बारीक- बारीक बॉक्सां आशिल्लीं. तातूंत भांगर आशिल्लें.
एकट्या वांगड्यान एक बॉक्स उगडून पळयलो. उपरांत आल्मारी आनी बॉक्सां भायर काडपाचो यत्न केलो. मात ते इतलें जड आशिल्लें, की जाग्यावेल्यान हालनाशिल्ले. मागीर सगळ्या बॉक्सांतल्यान खजिनो भायर काडून महाप्रभूंच्या शयनघरांत हालोवपाचें थारलें. हें काम पुराय करपाक टिमीक ७ वरां लागलीं.
भांगराचें मोल १०० कोटीं परस चड
जगन्नाथ संस्कृती तज्ञ भास्कर मिश्रा हांणी, भायल्या गाभार्यांत सांपडिल्लीं रत्नां आनी भांगरां शिंगरां मेजप सोपें ना. तशेंच दोनूय सांठ्यांनी सांपडिल्ल्या भांगराची मुळावी किंमत १०० कोटी रुपयां परस चड आसपाक शकता.
न्यायमूर्ती विश्वनाथ रथ हांच्या म्हणण्या प्रमाण वांगडी पुराय दिसभर उपासाचेर आशिल्ले. तिजोरेंतले चावयेन भितरलें दार उघडलें. पुराय कुडींत काळोख आशिल्लो. ताका लागून टीम रेडियम आनी हॅलोजन लायटी घेवन गेली.
६ बॉक्सां सील बंद
हाचे पयलीं आयतारा (१४ जुलय) ४६ वर्सां उपरांत रत्न भंडार उगडिल्लें. जातूंत हेर रत्न भंडाराच्यो वस्तू ६ चेस्टांत बदलून त्यो सील केल्ल्यो. तातूंत दवरिल्लें भांगर-रुपें स्ट्रॉंग रुमांत हालयलां.
आतां फुडें कितें
गजपती महाराज दिव्यसिंग देव हांणी, भांडार घराक कुलूप लावन तांणी सरकारी तिजोरेच्यो चावयो दिल्यात. भायल्या आनी भितरल्या रत्नांच्या भांडारांतल्यो सगळ्यो मोलादीक वस्तू बेडरुमांत आसात. दोनूय राखीव जागे एएसआयकडेन दितले. लेझर स्कॅनिंगा वरवीं वणटी दुरुस्त करपाचो आराखडो तयार करतले.
रत्नभंडारां सोरपूय सांपडूंक ना आनी बोगदोय
देवळाचे प्रशासक आनी समिती वांगडी अरविंद पाधी हांणी सांगलें, भितरल्या रत्न भंडारांत सोरोपूय दिसूंक ना आनी कसलोच बोगदोय दिसूंक ना. ह्यो सगळ्यो फकत वावड्यो आशिल्ल्यो. भांगराची वळेरी आनी लेखापरीक्षणाचो निर्णय आजूनय घेवंक ना. स्नेक हेल्पलायनचे वांगडी सुवेंदू मलिक हांणी, आमी पुराय वेळ स्टोरेज रुमा भायर आशिल्ले अशें सांगलें.
चावयो शेणिल्ल्यान रत्नभंडार २०१८ त उगडूंक मेळूंक ना
२०१८ त, ओडिशा उच्च न्यायालयान राज्य सरकाराक रत्नभंडार उगडपाचे निर्देश दिल्ले. मात, न्यायालयाच्या आदेशा प्रमाण ४ एप्रील २०१८ दिसा रत्नभंडारच्या चेंबरांत १६ जाणांचो पंगड पावलो. मात तांकां तेन्ना रिकाम्या हातांनी परतचें पडलें. ताचें कारण म्हळ्यार रत्नभंडाराची चावी शेणिल्ल्याचो दावो केलो. उपरांत तेन्नाचे मुख्यमंत्री नवीन पटनायक हांणी ४ जून २०१८ दिसा न्यायालयीन चवकशीचे आदेश दिले. तपास समितीन चावये कडेन संबंदीत आपलो अहवाल २९ नोव्हेंबर २०१८ दिसा सरकाराक सादर केलो. मात सरकारान तो भौशीक करूंक ना आनी चावये विशीं कांयच सांपडूंक ना.
२०१८ त, तेन्नाचे कायदो मंत्री प्रताप जेना हांणी विधानसभेंत सांगलें, रत्नभंडारांत १२,८३१ परस चड भांगरा वस्ती आसा. तातूंत मोलादीक रत्नां आसात. तशेंच २२,१५३ भरिल्लीं रुप्याचीं आयदणां आनी हेर वस्तू आसात. फाटल्या वर्सा ऑगस्टांत जगन्नाथ मंदिर वेवस्थापन समितीन २०२४चे वर्सुकी रथयात्रे मजगतीं रत्न भंडार उगडपाची शिफारस राज्य सरकाराक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
