भांगरभूंय | प्रतिनिधी
पणजी : मंत्रालयांत आयज जाल्ले एके कार्यावळींत मुख्यमंत्री डॉ. प्रमोद सावंत हांणी ब्रँडन वेलेंटिन क्रॅस्टो हांकां भारतीय नागरिकत्वाचें प्रमाणपत्र दिलें. ब्रँडन हे मूळ गोंयचे आनी पाकिस्तानी नागरीक. तांकां नागरिकत्व दुरुस्ती कायद्यां खाला (सीएए) भारतीय नागरिकत्व भेटयलें.
ह्या वेळार क्रॅस्टो हांची घरकान्न आनी भुरगीं, मुखेल सचीव व्ही कांडावेळू आनी हेर अधिकारी हजर आशिल्ले.
ब्रँडन क्रॅस्टा विशीं
क्रॅस्टो हांचें कुटूंब मूळ हणजुणचें. ब्रँडन हांचो आजो देशाचे फाळणी पयलीं पाकिस्तानाक गेल्लो. तांची हणजुण्यां मालमत्ता आशिल्ली. ब्रँडन हांचे पालक १९८१ वर्सा गोंयांत परतले आनी आपल्या बापायच्या घरा रावपाक लागले. फाळणी आदीं भारत जरी अखंड आसलो तरी ब्रेंडन हांकां भारतीय नागरिकत्व मेळनाशिल्लें. अशा नागरिकांक न्याय दिवपा खातीरूच सीएए हाडलो, अशें मुख्यमंत्र्यांनी सांगलें.
तांणी मुखार म्हणलें, प्रधानमंत्री नरेंद्र मोदी हांणी अशा नागरिकां खातीरूच हो कायदो हाडिल्लो. ते प्रमाण पाकिस्तान, बांग्लादेश आनी अफगाणिस्तानच्या मूळ भारतीय हिंदू, शीख आनी क्रिस्तांव धर्मांतल्या लोकांक नागरिकत्व दिता. हो कायदो हाडले उपरांत ताका खूब विरोध जालो. मात ह्या कायद्याक लागून खुबश्या जाणांक़ फायदो जालो. ह्या कायद्याक लागूनच ब्रँडन हांकां ४४ वर्सांच्या संघर्षा उपरांत न्याय मेळ्ळो.
भारतीय नागरिकत्व दिल्ले खातीर ब्रँडन हांणी मुख्यमंत्री तशेंच केंद्र आनी राज्य सरकारचे उपकार मानले. ४४ वर्सां उपरांत भारतीय नागरिकत्व मेळिल्ल्यान आपूण भारावन गेल्ल्याचें तांणी सांगलें. ह्या कायद्या खाला आतां मेरेन गोंयच्या तिगां जाणांक भारतीय नागरिकत्व दिलें. ह्यान पयलीं जोझेफ पेरेरा आनी जेन पेरेरा हांकांय भारतीय नागरिकत्व दिलां. जाल्यार चवथो अर्ज सध्या विचारा खाला आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
