भांगरभूंय | प्रतिनिधी
पणजी : भारतीय आयुर्विमा महामंडळाच्या (एलआयसी) अधिकार्याचेर वट्ट ४३.८० लाख रुपयांची भानगड केल्ल्या प्रकरणांत केंद्रीय गुप्तचर विभागाच्या (सीबीआय) लाचलुचपत प्रतिबंधक फांट्यान गुन्यांव दाखल केला. संबंदीत प्रकरणांत दुबावीत तरेन सात अर्थीक वेव्हार जाल्ल्याचेंय तपासांत उक्तें जालां. गजेंद्रनाथ राताबोली अशें ह्या दुबावीत अधिकार्याचें नांव. तांणी एलआयसीच्या पेंशन आनी ग्रुप स्कीम विभागांत प्रशासकीय अधिकारी म्हणून काम करतना वट्ट ४३.८० लाखांची भानगड केल्ल्याचो आरोप आसा.
फटींगपणां, विश्वासघात, पुरावे नश्ट करप आनी सरकारी कर्मचार्यां वरवीं पदाचो दुरुपेग अश्या गंभीर गुन्यांवांनी हात आशिल्ल्याचें कळून आयिल्ल्या प्रकरणांत तांचे आड भारतीय दंड विधानाच्या विवीध कलमां खाला (१२० ब , ४०९, २०१, २०४) आनी भ्रश्टाचार प्रतिबंधक कायद्या प्रमाण गुन्यांव दाखल केला.
सीबीआयच्या तपासांत जुलय २०२३ ते जानेवारी २०२४ मजगतीं ७ अर्थीक वेव्हार दिसून आयले. वेव्हारांचें वट्ट दर ४३.८० लाख रुपया इतली आशिल्ल्यान तातूंत २.९० लाख, ४.९० लाख, ३.९५ लाख, ४.९५ लाख, १३.९० लाख, ९.७५ लाख आनी ३.४५ लाखांचो घोटाळो जाल्ल्याचें मुखार आयलां. ह्या प्रकरणांत नितेश नायक आनी एका थळाव्या दुकान धनया सयत कांय अनवळखी मनशांकूय आरोपी केल्यात. जेन्ना हे गैरवेव्हार उक्ते जाले, ताच्या दुसर्या दिसा तिगां लावार्थ्यांनी तांच्या खात्यांत जमा जाल्लें दर एलआयसी फाट्याक परत केलें. उरिल्ल्या प्रकरणांचो तपास सुरू आसा.
एफआयआरांत नमूद केल्ले प्रमाण, राताबोली हांणी भानगड लिपोवपा खातीर एलआयसीचे संबंदीत रेकॉर्डस नश्ट करपाचे वा बदल करपाचे यत्न केल्ले. तांणी ही रक्कम पयलीं तिर्हाईत मनशांच्या खात्यांत धाडली आनी उपरांत स्वताच्या खात्यांत वळयली. मजगतीं, ह्या प्रकरणांत एलआयसीक वट्ट ३० लाख रुपयांचें लुकसाण सोसचें पडलें. एलआयसीक ३० लाख रुपयांची रक्कम राताबोली हांणी परत केले उपरांतूय तांचेर कायदेशीर कारवाय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
