भांगरभूंय | प्रतिनिधी
पणजीः सरकारान आतां मेरेन १२ मीनाच्या खणींच्या ब्लॉकांची पावणी केल्या. ३ ब्लॉकांनी खणीचें काम सुरू जालां आनी ४ ब्लॉक सुरु करपाची प्रक्रीया चालू आसा. उरिल्ल्या ब्लॉकांक परवानगी खातीर अर्ज केल्यात, अशें मुख्यमंत्री डॉ. प्रमोद सावंत हांणी सांगलें.
सरकार मीन खणी आयज सुरू जाता, फाल्यां सुरू जाता अशें सांगून फटयता, असो आरोप केपेंचे आमदार एल्टन डिकोस्टा हांणी सभाघरांत केलो. आमी बेकायदेशीर मीन काडपा आड आसात आनी आमकां शास्वत पद्धतीन हें मीन काडिल्लें जाय. पावणी केल्ल्या १२ ब्लॉकां मदले ८ ब्लॉक उत्तर गोंयांत जाल्यार फक्त ३ ब्लॉक दक्षीण गोंयांत आसात. हो भेदभाव कित्याक. गोंयांत पुराय मीना खणी केन्ना सुरू जातल्यो, असो प्रस्न डिकोस्टा हांणी केलो.
हाचेर जाप दितना मुख्यमंत्री डॉ. सावंत हांणी सांगलें, राज्यांत शाश्वत पध्दतीन मीना खणी सुरू करपा खातीर राज्यांत २०१५ सावन ते आतां मेरेन १२ ब्लॉकांची पावणी केल्या. पर्यावरण दाखलो, रान दाखलो, प्रदुशण नियंत्रण मंडळाचो दाखलो, मीन खणी महासंचालकाचो सुरक्षा दाखलो घेवन ३ ब्लॉकांनी मीन काडपाचें काम सुरु जालां. ४ ब्लॉक सुरू करपाची प्रक्रीया चालू आसा. हेर ब्लॉकांनी गरजेच्यो परवानगी आनी दाखल्या खातीर अर्ज केल्यात. दक्षिणेंत चडशे ब्लॉक रान वाठारांत आयिल्ल्यान तांचे पावणेक कळाव जाला आनी सरकारान कसलोच भेदभाव करूंक ना, अशी म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
