भांगरभूंय | प्रतिनिधी
पणजी : सक्तवसुली संचालनालयान (ईडी) मनी लॉन्ड्रिंग कायद्या खाला मे. युदियो प्रा. लि. कंपनीचे वेवस्थापकीय संचालक कृष्ण कुमार उर्फ विजय कुमार जैस्वाल आनी ताचे घरकान्नी आड मेरशेच्या उत्तर गोंय जिल्लो आनी सत्र न्यायालयांत आरोपपत्र दाखल केलां. त्या दोगांयनी चड व्याजाचें हांयस दाखोवन राज्यांतल्या गुंतवणूकदारांक सुमार ३ कोटीं परस चड रुपयांची तोपी घातल्ली.
गोंय पुलिसांच्या अर्थीक विभागान (ईओसी) गुंतवणूकदारांच्या ईमेला वरवीं आयिल्ल्या कागाळींवेल्यान ८ जून २०२२ दिसा गुन्यांव दाखल केल्लो. ते प्रमाण, मे. युदिवो प्रा. लि. कंपनीचे वेवस्थापकीय संचालक विजय कुमार जैस्वाल हांणी १८ फेब्रुवारी २०२२ दिसा फातोर्डा कार्यालय उक्तें करून गुंतवणूकदारांक तीन येवजण्यां वरवीं चड व्याजाचें हांयस दाखयिल्लें. हातूंत पयलीं येवजण ११ हजार गुंतवणूक केले उपरांत स म्हयन्यां उपरांत २३,४०० रुपयां सयत फुडले सात म्हयने २००० प्रती म्हयने दितले अशें हांयस दाखयल्लें.
दुसरी येवजण १,२१,००० रुपय गुंतवणूक केले उपरांत धा म्हयन्यां उपरांत २,३४,००० रुपयां सयत दर म्हयन्याक ९ हजार रुपया दिवपाचें हांयस, तिसरी येवजण २८,५०० रुपया गुंतवणूक केले उपरांत धा म्हयन्यां उपरांत दर म्हयन्याक २ हजार रुपया, उपरांत १२, १८ व्या म्हयन्यांत २० हजार रुपया दिवपाचे आनी हेर विवीध येवजण्यां वरवीं हांयस दाखयिल्ल्याचें म्हणिल्लें. तशेंच हे खातीर कंपनीन ९ एजंटांची नियुक्ती केल्ली. कांय काळ गुंतवणूकदारांक थारिल्ले प्रमाण परतावो दिलो.
मजगतीं, कंपनीन हे येवजणे खाला गुंतवणूकदारांक सुमार ३ कोटी रुपयांक फटोवन कार्यालय बंद करून पळ काडली. कंपनीन फटींगपणां केल्ल्याचें समजले उपरांत गुंतवणूकदारांनी ईमेला वरवीं विभागांत कागाळ दाखल केल्ली. विभागाचे पुलीस निरीक्षक राजाशद शेख हांणी राज्या वतीन कागाळ दाखल केल्ली. तेन्नाचे उपनिरीक्षक पराग पारेख हांणी कंपनीचे वेवस्थापकीय संचालक विजय कुमार जैस्वाल, तांची घरकान्न रश्मी जैस्वाल, सुभाष चंद्रा हांचे सयत ९ एजंटां आड विवीध कलमां खाला गुन्यांव दाखल केला. ह्या प्रकरणांत विभागान विजय कुमार जैस्वाल ह्या दुबाविताक अटक केल्ली. उपरांत कंपनीचो प्रमोटर दुबावीत सुभाष चंद्रा हाका उत्तर पूर्व दिल्लीच्यान अटक केल्ली. तपास पुराय करून मडगांवच्या गोवा जिल्लो आनी सत्र न्यायालयात आरोपपत्र दाखल केल्लें.
मजगतीं, ईडीनूय चवकशी सुरू केली. ईडीन संचालक कृष्ण कुमार उर्फ विजय कुमार जैस्वाल आनी तांची घरकान्न रश्मी जैस्वाल हांचे सयत युदिवो मार्केटिंग प्रा.लि., युदिवो लायफकेअर प्रा. लि. आनी युदिवो प्रॉपर्टी आनी प्रोफिंट्स प्रा. लि. आड वयल्या न्यायालयांत आरोपपत्र दाखल केलें. ह्या प्रकरणाची फुडली सुनावणी ८ ऑगस्टाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
