भांगरभूंय | प्रतिनिधी
पणजी : नगर नियोजन कायद्यांतलें कलम ३९ अ रद्द करपा विशीं आमदार वीरेश बोरकार हांणी उपोशण सुरू केलां. तांची प्रकृती इबाडूं येता, हाची शक्यताय लक्षांत घेवन हे विशीं विधानसभेचें विशेश अधिवेशन आपोवचें अशी मागणी विरोधी पक्षांनी केली. बिरेस्तारा पक्षांच्या शिश्टमंडळान राज्यपाल पुसापती गजपती अशोक राजू हांची भेट घेवन हे विशीं निवेदन दिलें. ह्या वेळार विरोधी पक्ष फुडारी युरी आलेमाव, आमदार वेन्झी व्हिएगस, आमदार क्रुझ सिल्वा आनी हेर हाजीर आशिल्ले.
आलेमाव हांणी सांगलें, आमी ३९ अ आड शांततेंत आंदोलन करतालो. मात तरी आंदोलनांत वांटेकार जाल्ल्या नागरिकांक खटले दाखल करपाच्यो धमक्यो दितात.
ही कृती लोकशायेच्या पुरायेन आड आसा. सध्या हो मुद्दो संवेदनशील जाला. हाचेर बेगोबेग उपाय येवजण करूंक ना जाल्यार कायदो आनी सुवेवस्थेचो प्रस्न निर्माण जावपाक शकता. तशेंच उपोशणाक लागून बोरकार हांचो शरिरीक त्रास वाडपाची श्क्यताय आसा. हाका लागून विशेश अधिवेशन घेवप गरजेचें आसा.
तांणी म्हणलें, ह्या आंदोनांत सगल्यांनी एकठांय येवप गरजेचें. कोणेंच मुखेल मुद्द्या पसून भरकटचें न्हय. न्या. फेरदिन रिबेलो हांच्या मसुदो विधेयकाचेर आमी एक विधेयक तयार केलां. हातूंत जमीन रूपांतरा संबंदीत सगले कायदे रद्द करपाची मागणी केल्या. सरकारान स्वता ह्या स्वरुपाचें विधेयक हाडचें वा आमचें विधेयक मंजूर करचें. ह्यान पयलीं सरकारान भुमिपूत्र आनी हेर विधेयकां, कायदे रद्द केल्यात. ताका लागून कलम ३९ अ रद्द करपूय शक्य आसा.
फायल गायब जाल्ल्याचें काल समजलें?
आलेमांव हांणी म्हणलें, भाजप नाटकां करपांत कुशळ आसा. आंदोलना उपरांत जायत्या दिसांनी सरकाराक काल फायल गायब जाल्ल्याचें कशें समजलें? आतां हेर विरोधी आमदारांचेरूय अशेच फट आरोप करतले. मात गोंयकार आमचे वांगडा आसा. हाका लागून आमी असल्या नाटकांक भियेनात.
बंदखण पावची ना
वेन्झी व्हिएगस हांणी सांगलें,आंदोलनांत वांटेकार जाल्ल्यांक बंदखणींत घालपाच्यो धमक्यो येतात. लोकांनी अशा धमक्यांक भियेवचें न्हय. गोंयांक वाटोवपा खातीर त्या प्रसंगार आमी बंदणींत वचपाक तयार आसात. सगली जनता रस्त्यार आयली काय सरकाराक बंदखण अपुर्ण पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
