भांगरभूंय | प्रतिनिधी
नवी दिल्ली, खबरां संस्था : देशांतल्या विमान प्रवाशां खातीर एक बरी खबर आसा. ती म्हणल्यार आतां प्रवाशांक देशांतल्या विमानांत इंटरनॅट सुविधा मेळटली. ताका लागून देशांतले विमान प्रवासी आतां विमानांतूय सोशल मिडिया, ई-मेल, आवडपी कार्यावळी आनी चित्रपट ऑनलायन पळोवपाक शकतले. एअर इंडिया देशांत आनी आंतरराष्ट्रीय उड्डाणांनी प्रवाशां खातीर वाय-फाय इंटरनेट सेवा दितले अशें आयज जाहीर केलां. मजगतीं अशे तरेची वायफाय इंटरनेट सेवा दिवपी एअर इंडिया देशांतली पयली एअरलायन्स थारल्या.
मजगतीं, एअर इंडियाच्या एअर बस ३५०, बोईंग ७८७-९ आनी एअर बस ३२१ निओ ह्या वेंचीक विमानांनीय ही वाय-फाय इंटरनेट सेवा उपलब्ध आसतली. एअर इंडिया वतीन आंतरराष्ट्रीय विमानांचेर ह्यान पयलींच इंटरनेट कनेक्टिव्हिटी सुविधा सुरू केली. मजगतीं सुरवातेकच्या काळांत ह्याच विमानांचेर ही सुविधा फुकट मेळटली. फुडें ते ल्हव ल्हव सगळ्या विमानांनी ही सुविधा दितले.
ह्या वाय-फाय सेवे वरवीं प्रवाशांक आपले लॅपटॉप, टॅब्लेट आनी स्मार्टफोनांचेर इंटरनेट वापरपाक मेळटलें. विमान १० हजार फूट उंचायेर पावले उपरांत प्रवाशांक तांचीं उपकरणां इंटरनेटाक जोडपाची परवानगी मेळटली. अशें जरी आसलें तरी, इन-फ्लाइट इंटरनेट सुविधा कनेक्टिव्हिटी, वट्ट बँडविड्थ, मार्ग आनी सरकारी निर्बंध अश्या घटकांचेर निंबून आसतलें.
हे विशीं उलयतना एअर इंडियाचे अधिकारी राजेश डोगरा हांणी, कनेक्टिव्हिटी हो आतां आधुनीक प्रवासाचो म्हत्वाचो भाग जाला. कांय जाणांक रिअल-टायम शेअरिंगा खातीर इंटरनेट लागता, जाल्यार कोणाक ताच्या कामा खातीर. हे फाटलो हेतू कितेंय आसूं, आमकां खात्री आसा की आमचे सोयरे वेब कडेन कनॅक्ट जाले उपरांत आमची तोखणाय करतले आनी एअर इंडियाच्या नव्या अणभवाचो आस्वाद घेतले.
मजगतीं, विमानंात इंटरनेट सेवा दिवप ही नवी संकल्पना न्हय. जायत्या आंतरराष्ट्रीय विमानांनी फाटल्या जायत्या वर्सां सावन ही सुविधा दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
