भांगरभूंय | प्रतिनिधी
पणजीः राज्यांतल्यो वट्ट ६ हजार किलोमीटर पायपलायनी मदली २ हजार किमी पायपलायन ४० वर्सां पोरणी आसा. ही २७६ किमी पोरणी पायपलायन बदलपाचें काम हातांत घेतला आनी उरिल्ली पायपलायन तीन वर्सां भितर पांवड्याचेर बदलपाक हातांत घेतले. सद्या २६% जनतेक २४ वरां उदक मेळटा – पियेवपाचे उदका मंत्री सुभाष फळदेसाय हांणी सांगलें.
सोमारा सभाघरांत प्रस्नोत्तर वरा वेळार विरोधकांनी उदका पुरवणेचो विशय नेटान लावन धरलो. तांच्या प्रस्नाक जाप दितना मंत्री फळदेसाय उलयताले.
राज्यांत पोरण्यो पायपलायनी अजून बदलूंक नात. १० कोटींच्या कामाचो प्रस्ताव पियेवपाच्या उदका खात्यान दवरला मात वित्त खात्याची मान्यताय मेळूंकना. तशेंच ३२५ एमएलडी उदका प्रकल्पाचें बांदकाम पांवड्यार आसात. ही पायाभूत सुविधा जाग्यार घालपाक आनी फ्लॉ मिटर बसोवपा खातीर खातें कसली उपाय येवजण घेतले, असो प्रस्न व्हिएगस हांणी केलो.
वर्स २०२५-२६ वर्सा ३७८ कोटी इतली अर्थसंकल्पीय तरतुद जाल्ली. मात तातूंतले ४४ टक्के म्हळ्यार २१० कोटी खर्च जाल्यात. वेळा वेळार अर्थसंकल्पीय तरतुदीचो वापर जायना, असो आरोप विरोधी पक्ष फुडारी युरी आलेमाव हांणी केलो.
सरकाराक हर घर जल खातीर कैंद्रीय पुरस्कार मेळ्ळा. मात प्रत्यक्षांत नळ ना आनी जल लेगीत ना. जो मेरेन उदकाची पायांभूत सुविधा तयार जायना तो मेरेन मेगा आनी व्हडल्या वेवसायीक प्रकल्पाक उदका जोडणी बंद दवरची, अशी मागणी आलेमाव हांणी केली.
हे विशीं जाप दितना मंत्री फळदेसाय हांणी सांगलें, सद्या राज्याक ६९५ एमएलडी उदकाची गरज आसा. मात सद्या ३३६ एमएलडी उदकाची पुरवण जाता.
डिसेंबर २०२६ मेरेन ३२५ एमएलडी उदका पुरवणेचो बंदोबस्त करतले. हे मजगतीं अतिरीक्त १५० एमएलडी उदक सोडून उदकाचो उणाव पयस करतले. तशेंच तीन वर्सां भितर पांवड्या पांवड्यार ५०० किमी पोरणीं पायपां बदलपाचें काम हातांत घेतले. २ हजार किमी पोरणीं पायपां बदलपा विशींचो प्रस्ताव आमी केंद्राकडेन दवरला. केंद्र आनी राज्य सरकाराचो नीधी फावो जायत जाल्यार देड वर्सा भितर हें काम पुराय जावं ये, अशी म्हायती फळदेसाय हांणी दिली.
जेन्ना मॅगा प्रकल्पांक उदका जोडणी दिवपाचो विशय येता तेन्ना प्राधान्य हे आमी घरगूती गिरायकांक दितात. बांदकाम प्रकल्पाक जोडणी दिवचे पयलीं वाठारांत फावो इतली पुरवण जाता काय हे विशीं खात्याचें अभियंते विश्लेशण करतात. ज्या वाठारांनी उदका सुविधा नात थंयसर खातें प्रकल्पांक मान्यताय दिना, अशें स्पश्टीकरण फळदेसाय हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
