भांगरभूंय | प्रतिनिधी
पणजी: कोंकणी भाशा मंडळ-गोंय, युवा जैतीवंत- दिवचल आनी नारायण झांट्ये वाणिज्य महाविद्यालय- सर्वण, दिवचल हांच्या जोडपालवान २५ आनी २६ जानेवारीक २६ वो गोवा युवा महोत्सव जालो. ह्या सुवाळ्याचें उक्तावण मुख्यमंत्री डॉ. प्रमोद सावंत हांचे हस्तुकीं जालें.
ह्या महोत्सवाक जायत्या पंगडांनी वांटो घेतलो आनी आपापली कला सादर केली. हातूंत कुडचडें, सांवड्डेंचो ‘कलासक्त’ हो पंगड जैतिवंत थारलो. जाल्यार गणपती कला आनी सांस्कृतीक संघ, तोर्डा-पैठण आनी अंत्रुज घुडयो, बांदोडें हे दोनूय पंगड उपजैतिवंत थारले. तशेंच हरमल, पेडणेंचे गणपत पार्सेकर शिक्षणशास्त्र महाविद्यालयाक उत्कृश्ठ शिक्षणीक संस्था म्हणून इनाम फावो जालें.
मजगतीं, अंदुंच्या २६व्या युवा महोत्सवाक १२ शिक्षणीक संस्थांनी आनी ११ पंगडांनी वांटो घेतिल्लो. दोन दीस चलिल्ल्या ह्या महोत्सवांत साबार सर्ती घडोवन हाडल्यो. ह्या वेळार तरणाट्यां मदले विवीध कलागूण पळोवपाक मेळ्ळे. गांवांगांवांतल्या आयिल्ल्या शेंकड्यांनी तरणाट्यांनी ह्या महोत्सवाक हाजिरी लायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
