भांगरभूंय | प्रतिनिधी
पणजीः दीनदयाळ अंत्योदय येवजण- राष्ट्रीय शार उपजीवीका मिशना खाला फाटल्या १० वर्सानी गोंयच्या २६४ आप मजत गटांनी लघु उद्देग सुरू केल्यात आनी १८ कोटी मेरेनचो लाव ह्या गटांक फावो जाला. जाल्यार हे येवजणे खाला तातुंतल्या २३ गटांनी आपलो वेवसाय चलोवपाक रिणाचो लाव घेतला, अशी म्हायती गृह निर्माण आनी शार वेवस्थापन राज्य मंत्री टोखान शाहू हांणी दिल्या.
लोकसभेच्या पटलार लेखी जाप दितना मंत्री शाहू हांणी ही म्हायती दिल्या. आप मजत गटांक अर्थीक सहाय्य दिवपा खातीर मंत्रालय दिनदयाळ अंत्योदय येवजण- राष्ट्रीय शार उपजीवीका मिशन चालीक लायता. हे येवजणे खाला केंद्र सरकार ६० टक्के जाल्यार राज्य सरकार ४० टक्के खर्चाचो भार घेता.
राज्यांत १४०६ आप मजत गटांची थापणूक जाल्या. तातुंतल्या २६४ गटांनी हे येवजणेचो लाव घेवन लघू उद्देग सुरू केल्यात आनी उद्देग फुडें चलोवपाक २३ गटांनी हे येवजणे खाला रीण घेतलां.
हे येवजणे खाला लाव घेवपाचे मागणेंत २०१७ ते २०२२ मेरेन बरीच वाड जावन निधी दिवपाच्या आंकड्यांत लाखां वयल्यान दर वर्सा २ ते ४ कोटी मेरेन पाविल्ली. पूण २०२३ ते आतां मेरेन शुन्य नीधी राज्यांतल्या गटांक आयला.
२६४ गटांक १८.४८ कोटी मेरेनची अर्थीक मजत फाटल्या १० वर्सांनी दिल्या. २०१४-१५ वर्सा ६२ लाख, २०१५-१६ वर्सा शुन्य, २०१६-१७ वर्सा २३ लाख, २०१७-१८ वर्सा २.०८ कोटी, २०१८-१९ वर्सा ४.८५ कोटी, २०१९-२० वर्सा ३.४० कोटी, २०२०-२१ वर्सा ३.९० कोटी, २०२१-२२ वर्सा ३.४० कोटी, २०२२-२३, २०२३-२४ आनी २०२४-२५ ह्या दरेका वर्साक शुन्य निधी गटांक दिल्लो.
हे येवजणेच्या कुशळटाय प्रशिक्षण आनी प्लेसमेंट घटका खाला रोजगार निर्माण करतात. मागास शार वाठारांत कपडे, सोबितकाय आनी केस कातरप, बांधकाम, इलेक्ट्रीकल, फॅशन डीजायन, जेवण प्रक्रीया, आयटी, वैजकी आनी नर्सींग मळार कुशळ प्रशिक्षण ह्या मिशना खाला दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
