भांगरभूंय | प्रतिनिधी
विश्वजीत राणे : राज्यांत तीन म्हयन्यांत ५ लाख झाडांची लागवड
मडगांव : राज्यांत फुडल्या तीन महयन्यांच्या काळांत विवीध सुवातांचेर सुमार पांच लाख झाडांची लागवड करतले. तशेंच पालिका वाठारांत सुवात उपलब्ध आसल्यार झाडां रोयतले आनी तांची जतना जीसुडा घेतली. तशेंच २५० एफएसआय परस चड उंच इमारतींक व्हर्टिंकल फॉरेस्ट केले बगर कसलेच तरेची मंजुरी मेळची ना, अशी म्हायती रानां मंत्री विश्वजीत राणे हांणी दिली.
मडगांवच्या सोनसडो कोयराच्या यार्डाचे सुवातेर उण्या वाठारांत दाट रान उबारपाचो उपक्रम सुरु केला. हाची सुरवात नगरनियोजन मंत्री विश्वजीत राणे हांचे सयत आमदार दिगंबर कामत, नगराध्यक्ष दामू शिरोडकार आनी नगरसेवकांचे हाजेरींत जाली. ह्या वेळान रान खातें, नगरनियोजन खात्याचे अधिकारीय हजर आशिल्ले.
ह्या वेळार मंत्री राणे हांणी सांगलें: गोंय हें ल्हान राज्य जरी आसलें तरी फुडल्या तीन म्हयन्यांच्या काळांत राज्यभर सुमार पांच लाख झाडांची लागवड करतले. हीं झाडां खंय लायलीं हाची म्हायती मेळटली. तशेंच पालिका वाठारांत जंय सुवात आसा, थंय पालिका मंडळाक वांगडा घेवन झाडां रोयतले. जीसुडा वरवीं तांचो सांबाळ करतले. पालिकांचेर कसलेच तरेचें वजें पडचें ना, अशेंय सांगलें.
२५० आनी ताचे परस चड एफएसआय आशिल्ल्या इमारतींचेर (व्हर्टीकल फॉरेस्ट) झाडां रोवपाचो निर्णय निर्णय घेतला. ते केले बगर खंयच्याच प्रकल्पाक मंजुरी मेळची ना. हाची अधिसुचवणी फुडल्या बिरेस्तार मेरेनच येतली. तशेंच ह्यां उंच इमारतींचो रंग हो धवो आसपाची गरज आसा. तो तापमान योग्य राखता. हे विशीं सिंगापूराकूय वैज्ञानीकांनी अभ्यासा मजगतीं उपाय काडल्यात. तशेंच इमारतींची उंचाय, पार्किंगची वेवस्था आनी हेर सुविधायो हे खातीर आनीक कांय निर्णय घेतले. म्हणून उंचाये विशीं निर्णय घेतले. ३०० एफएसआय परस चड उंची आसची ना. मात सात ते आठ माळयेच्या इमारतींक हाचो फायदो जातलो, अशें मंत्री राणे हांणी सांगलें.
दाट रानाच्या पयल्या प्रकल्पा खातीर नगरनियोजन आनी रान खात्यान सोनसडो यार्डाची निवड केल्या. हें पुरा जाले उपरांत हाचे फाटल्यान आशिल्लो कोयरूय दिसचो ना. मडगाव सावन ह्या प्रकल्पाची सुरुवात जाल्ल्यान शारी वाठारांत अशे तरेचीं दाट रानां उबारपाची संकल्पना अस्तित्वांत येतली. हाका सगल्यांनी सहकार्य करपाची गरज आमदार दिगंबर कामत हांणी उक्तायली.
नोकरे खातीर एक रुपयाय घेवंक ना: मंत्री राणे
नोकरे खातीर पयशे घेतात असो एक ऑडियो व्हायरल जाल्ल्यान हे विशीं उलयतना मंत्री विश्वजीत राणे हांणी सांगलें, सोशल मिडियाचेर कितेंय घालतात, हें सगलें घेवन बसचें न्हय. कोणा कडेन पुरावे आसत जाल्यार तांणी पुलीस स्टेशनांत वचून गुन्यांव नोंद करचो. आपल्या बापायच्या काळा सावन हांव राजकारणांत आसां. मात नोकरे खातीर कोणाचोच एक पयसो पसून घेवंक ना. कोणायकूय अशें दिसता जाल्यार तांणी कागाळ करची अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
