भांगरभूंय | प्रतिनिधी
पेडणें : तेन्नाचे मुख्यमंत्री मनोहर पर्रीकार, आदले मुख्यमंत्री प्रा. लक्ष्मीकांत पार्सेकार हांणी तुयें सामुदायीक भलायकी केंद्रा फाटल्यान शंभर खाटींचें नवें हॉस्पिटल बांबोळे हॉस्पिटलाक लिंक करपाचे पद्धतीचें उबारिल्लें. त्या हॉस्पिटलाची इमारत पुराय तयार जाल्या. मात फाटल्या सात वर्सां सावन तें सुरू करपाक सरकाराक अपेस आयलें. मात ८ तारखेर तुयें सामुदायिक भलायकी केंद्राचो तकटो नव्या हॉस्पिटलाचे इमारतीक लायिल्लो. हाका लागून नागरिकांनी खर तिडक उक्तायिल्ली. तुयें हॉस्पिटल कृती समितीनूय हे घडणुकेचो निशेध केलो. तुयेंच्या नव्या हॉस्पिटलांतलें सामुदायीक भलायकी केंद्र स्थलांतरीत करिनासतना, त्या हॉस्पिटलाक जिल्लो हॉस्पिटलचोय दर्जो दिनासतना १०० खाटींचें हॉस्पिटल बांबोळे हॉस्पिटलाक लिंक आसचें. तेच तरेन हें हॉस्पिटल सुरू करचें, अशी मागणी तुयें हॉस्पिटल कृती समितीन केल्ली.
मजगतीं ८ तारखेर नव्या हॉस्पिटलाचे इमारतीचेर तुयें सामुदायीक केंद्राचो तकटो लावन ह्या हॉस्पिटलांत तुयें सामुदायीक केंद्र स्थलांतरीत करतात काय? असो दुबाव नागरिकांक आशिल्लो. हाका लागून तिडक उक्तायल्ली. हे विशीं आमदार जीत आरोलकार हांणीय हें हॉस्पिटल बांबोळी हॉस्पिटलाक लिंक आसतलें आनी तेच तरेन तें सुरू करतले. जर ह्या हॉस्पिटलाचेर कोणेंय चुकून तशे तरेचो तकटो लायलो, जाल्यार तो चुकीच्या मार्गान लायला आसतलो, अशी प्रतिक्रिया तांणी दिली.
फाटल्या सात वर्सां सावन तुयें हॉस्पिटलाची इमारत पुरायेन तयार आशिल्ली. तें हॉस्पिटल बांबोळे हॉस्पिटलाक लींक करपाची येवजण आशिल्ली. तेच तरेचें हें हॉस्पिटल सुरू करपाक सरकारान कळाव केल्ल्यान नागरकांनी तिडक उक्तायिल्ली. तेच नदरेन तुये हॉस्पिटल नागरीक समितीन ह्या हॉस्पिटला विशीं जागृतायूय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
