२४ मार्च सावन अर्थसंकल्पीय अधिवेशन
भांगरभूंय | प्रतिनिधी
पणजी ः गोंयचे आठवे विधानसभेचें णववें अधिवेशन 24 मार्चा सावन सुरू जातलें. राज्यपाल श्रीधरन पिल्ले हांणी हे संबंदीची अधिसुचोवणी जारी केल्या. विधानसभेचें अर्थसंकल्पीय अधिवेशन 24, 25 आनी 26 मार्च अशें तीन दीस चलतले. मुख्यमंत्री डॉ. प्रमोद सावंत 26 मार्चाक 2025- 2026 वर्साचो अर्थसंकल्प सादर करतले.
केंद्रीय अर्थसंकल्प सादर जाले उपरांत फेब्रुवारींत राज्याचो अर्थसंकल्प सादर करतात. पूण, अर्थसंकल्पाची तयारी आनी खात्याचे बसकेक लागून फेब्रुवारींच्या अधिवेशनांत अर्थसंकल्प सादर जावंक शकलो ना. राज्यांत कर वसुली वाडिल्ल्यान फाटल्या वर्सांच्या तुळेंत अंदूंच्या अर्थसंकल्पांत खात्या खातीर व्हड तजवीज आसतली.
युरी आलेमांव हांची प्रतिक्रिया
विरोधी पक्ष फुडारी युरी आलेमांव हांणी तीन दिसांच्या अधिवेशनाचेर ट्विट करुन टिप्पणी केल्या. फकत तीन दिसांचें विधानसभा अधिवेशन आपोवपाचो निर्णया वेल्यान अशें दिसता की, सरकार विरोधकांच्या प्रस्नांक जाप दिवपाक भियेता. लोकशाय मुल्यां दुबळीं करपाचो सरकाराचो हो यत्न आनी लोकसेवकांक तांच्या हक्का पसून वंचित दवरपाचोय, अशें तांणी ह्या ट्विटांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
