भांगरभूंय | प्रतिनिधी
आयुर्वेद दिसाचो विशय: ‘आयुर्वेद लोकां खातीर आनी धर्तरेच्या कल्याणा खातीर’
पणजीः ‘आयुर्वेद लोकां खातीर आनी पुर्थ्वीच्या कल्याणा खातीर’ हो अंदूच्या आयुर्वेद दिसाचो विशय असा. २३ सप्टेंबराक पेडण्यां अखिल भारतीय आयुष संस्थेंत हो दीस मनोवन विद्यार्थ्यां खातीर चर्चा सत्र, बायलां खातीर भलायके विशीं कार्याशाळा आनी जैव विविधताय मंडळाच्या जोडपालवान वखदी वनस्पतीचो वनमहोत्सव घडोवन हाडटले, अशें अखिल भारतीय आयुर्वेद संस्थेचे संचालक प्रा. प्रदीप कुमार प्रजापती हांणी सांगलें.
आयुर्वेद दिसा निमतान घडोवन हाडिल्ले कार्यावळी विशींची म्हायती दितना प्रा. प्रजापती पणजे आपयल्ले पत्रकार परिशदेंत उलयताले. ह्या वेळार अखिल भारतीय आयुश संस्था गोंयची डिन प्रा. सुजाता कदम, भलायकी खात्याचे मुखेल वैजकी अधिकारी डॉ. उत्तम देसाय, आयुष मंत्रालयाची उपसंचालक डॉ. मीनल जोशी आनी हेर अधिकारी हजर आशिल्ले.
आयुर्वेद जनते खातीर आनी धर्तरेच्या कल्याणा खातीर हो विशय अंदूंच्या आयुर्वेद दिसा खातीर दवरून मानवी जीव सयत पशू आनी वनस्पतीचो आमी पर्यावरणाच्या रुपान प्रचार करून तांचे संरक्षण करतले, अशें प्रजापती हांणी सांगलें.
हालींच्या काळांत लायफस्टायल डिसोर्डर, मेटाबोलिसम डिसोर्डर अश्या दुयेंसांचेर नियंत्रण ना आनी आधुनीक उपचार ना. मात फकत प्राचिन पध्दती वापरून आमचे विचार आनी आहारा वरवीं आमी ह्या दुयेंसाचेर उपचार वा नियंत्रण हाडपाक शकता. आयुर्वेदाची कल्पना आमचे कडेन प्राचीन काळा सावन चलत आयल्या. घरा घरा भितर आमी आयुर्वेदचो उपेग करीत आसात आनी हाचो चडांत चड प्रचार कसो करप हो ह्या दिसाचो हेत आसा, अशी म्हायती प्रजापती हांणी दिली.
आयुर्वेद ही एक लोकांची चळवळ आसा. आयुर्वेदाची प्राचीन गिन्यानाचे आमी आधुनीक संशोधनांत आस्पाव करून आमकां संवसारीक भलायकी सेवे मुखार हाडपाक जाय. नागरीक, दोतोर, संशोधक आनी विद्यार्थ्यांनी हे राष्ट्रीय मोहिमेंत सक्रीयपणान वाटेकार जावचें, असो उलो प्रजापती हांणी मारला.
आयुर्वेद हो परंपरा आनी विज्ञान, व्यक्ती आनी समाज, मनीसपण आनी सैमाक जोडपी एक पुलाची भुमिका बजायता, अशें गोंय आयुश संस्थेची डीन डॉ. सुजाता कदम हांणी म्हणलें.
गोंय आयुष संस्था हें २५० खाटींचें हॉस्पिटल जावन आसा आनी हांगा दर दिसा २२ ओपीडी सेवा चालू आसता. ह्या हॉस्पिटलाचो ८०० परस दुयेंती आनी विदेशी लोकांनी लाव घेतला. ही संस्था शिक्षण, संशोधन आनी दुयेंती सेवा खातीर एक आघाडीचें केंद्र जावन आसा, अशें कदम हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
