भांगरभूंय | प्रतिनिधी
नवी दिल्ली, खबरां संस्था: मतदारांची वळेरी सुरळीत करपा खातीर वेंचणूक आयोग राष्ट्रीय पांवड्यार व्हडली मोहीम हातांत घेवपाचें आसा. हे खातीर मतदार वळखपत्रां आधारा कडेन जोडपाची कबलात जाल्या. पूण ही अट पुराय करपा खातीर मतदार नोंदणी खातीर अजून आपलो आधार नंबर दिवंक नाशिल्ल्या मतदारांकडल्यान कारण कळप गरजेचें. आतां मेरेन आयोगान ६६ कोटी मतदारांचे आधार इपीआयसी नंबर (मतदार फोटो वळखपत्र नंबर) जोडल्यात. पूण सुमार २२ कोटी मतदारांचे आधार आंकडे आजून मेळूंक नात. ताका लागून आधाराचेर आदारीत मतदार वळेरेंतल्यान डुप्लीकेशन काडून उडोवपाची प्रक्रिया लेगीत सुरू जावंक ना.
सुत्रांनी दिल्ले म्हायती प्रमाण मतदार वळेरेंतल्यान बनावट नांवांचो प्रस्न पयस करपा खातीर मतदारांक पावपाची येवजण आंखल्या. हातूंत बूथ लेव्हल ऑफिसर्सांक सक्रीय करतले, जे मतदारां कडेन तांच्या घरा संपर्क करतले. मजगतीं, हें कळटलें, जर एपीक क्रमांक आधारा कडेन लिंक केल्यात ताची पुश्टी कित्याक करूंक ना? जर तें जोडूंक ना जाल्यार कारण कळटलें. तशेंच, तांकां मतदान प्रक्रियेंत सक्रियपणान वांटेकार जावपा खातीर उर्बा दितले. बीएलओ मतदारांक तांचो नंबरूय आनी मतदाना कडेन संबंदीत तांच्या दरेका प्रस्नाची जाप दितले.
मतदारां मेरेन पावपा खातीर ही व्हड मोहीम विधानसभा वेंचणुकेच्या समांतर चलयतले. ज्या राज्यांत वेंचणुको जावपाच्यो आसात, थंय ही प्रक्रिया प्राधान्यान पुराय करतले. ह्या वर्साचे निमाणे कडेन बिहारांत जावपी वेंचणुकेंत बीएलओ मतदारां मेरेन पावयतले. जाल्यार, फुडल्या वर्सा प. बंगाल, तामिळनाडू आनी केरळांतल्या मतदारां कडेन संपर्क सादपाची येवजण राबयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
