भांगरभूंय | प्रतिनिधी
नवी दिल्ली, खबरां संस्था: २०५० मेरेन भारतांत २१.८ कोटी दादले आनी २३.१ कोटी बायलो मोटसाणीचे (ओबॅसीटी) बळी आसतले. वट्ट ४४.९ कोटी लोकसंख्येचे लागीं लागीं पंचात्तर टक्के लोक हांकां बळी पडटले असो अदमास लॅन्सेटच्या एका नव्या अभ्यासांत आसा. संवसारीक पांवड्यार, २०५० मेरेन सगळ्या प्रौढ भुरग्यां मदले अर्दे परस चड आनी नेण्ट्या भुरग्यां मदलीं पंचात्तर टक्के भुरगीं चड वजनाचे वा मोटसाणेक बळी पडटले, अशें अभ्यासांत म्हणलां.
२०२१ वर्सा संवसारांतल्या मोटे आनी चड वजन आशिल्ल्या प्रौढां मदले निम्मे प्रौढ लोक भारता सयत आठ देशांनी रावताले. हें लक्षांत घेत ही वाड हुस्क्याची आसा. अभ्यासांत अशें म्हणलां, उण्या आनी मध्यम उत्पन्न आशिल्ल्या देशांनी ओबॅसीटीचें वाडपी प्रमाण बालपणांतल्या सेगीत कुपोशण आनी संसर्गजन्य रोगांक लागून जाता. बालपणांतल्या कुपोषणाक लागून प्रौढावस्थेंत मोटसाण येता, हाका लागून टायप २ गोडेंमूत, काळीज आनी रगताच्या शिरयां संबंदी रोग आनी कांय विशिश्ट कर्करोग अश्या विकारांचो बेगीन जावपाचो धोको वाडटा.
दुसरे कडेन, भुरग्यां मदींय वाडपी वजनाची शक्याताय आसा. भारतांत भुरग्यां मदीं ओबॅसीटी आनी चड वजनाचे प्रमाण १९९०त ०.४६ कोटीं वयल्यान २०२१त १.३ कोटींचेर पावलें आनी २०५०त ते १.६ कोटीं मेरेन वाडोवपाचो अदमास आसा. चलयां मदीं १९९०त ते ०.४५ कोटीं वयल्यान २०२१त १.२४ कोटींचेर पावल्यात आनी २०५०त ते १.४४ कोटीं मेरेन वाडपाचो अदमास आसा, अशें अभ्यासांत म्हणलां.
मोटसाण कित्याक वाडत आसा?
ओबॅसीटीचे साथीचें एक मुखेल कारण म्हळ्यार मीठ, साखर आनी चरबीयुक्त प्रक्रिया केल्ल्या जेवण जेवपांत वाड. २००९ ते २०१९ मजगतीं भारत आनी व्हिएतनामांत प्रक्रिया केल्लें जेवण आनी सॉफ्टड्रिक्सांचे विक्रेंत सगळ्यांत व्हड वाड दिसून आयली, अशें अभ्यासांत म्हणलां.
ओबॅसीटी अँड मेटाबॉलीक सर्जरी सोसायटी ऑफ इंडियाच्या वैज्ञानीक समितीचें नेतृत्व करपी डॉ. अपर्णा गोविल भास्कर म्हणटात, वाडपी शारीकरणाक लागून शरिरीक हालचाली उण्यो जाल्यात, प्रवासाचो वेळ वाडला आनी ताका लागून कामाचे सुवातेर रावचें पडटा. कॅलरीज चड आशिल्ल्या, रिफायंड कार्बोहायड्रेट्स, ट्रान्स फॅट्स आनी साखरेचें प्रमाण चड आशिल्ल्यो प्रक्रिया केल्ल्या जेवणा कडेन वळयल्ल्यान वजन वाडपाक मात्सो हातभार लागला. तशेंच कामा कडेन संबंदीत वाडपी ताण, उणी न्हीद आनी मानसीक भलायकी विकार हे ओबॅसिटी कडेन गेल्यात.
ओबॅसिटी हें एक मुखेल असंसर्गजन्य दुयेंस (एनसीडी) म्हणून अधिकृतपणान वळखपाक जाय आनी ताचे प्रतिबंध आनी वेवस्थापन भारताच्या भौशीक भलायकी धोरणांत आसपावपाक जाय. ओबॅसिटी जागरूकताय मोहीम, कामाचे सुवातेर कल्याण कार्यावळ, उपचारांची उपलब्धताय, जेवणाचेर कर हेरांचेर आसपाव आसचो. ओबॅसिटी ट्रेंड, परिणाम आनी हस्तक्षेपांचो फॉलोअप घेवपा खातीर राष्ट्रीय नोंदणी स्थापन करप म्हत्वाचें आसा, अशें डॉ. भास्कर म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
