भांगरभूंय | प्रतिनिधी
खासदार अनुरागसिंग ठाकुर हांचो विस्वास
पणजी : भारताची लोकसंख्या, मुळाव्या सुविधांचो विचार केलो जाल्यार २०३६ वर्साच्या ऑलींपीक यजमानपदाचो मान भारताकूच मेळपाक जाय. फुडल्या वर्सा भारत आयोजना खातीरची बोली (बीड) सादर करतलो, अशें आदले केंद्रीय खेळां मंत्री आनी खासदार अनुरागसिंग ठाकूर हांणी सांगलें.
हडफड्यां संवसारीक पावंड्यावेली फिडे बुद्दिबळ सर्त सुरू आसा. हे सर्तीक भेट दिले उपरांत तांणी पत्रकार परिशद घेतली.
१.४ अब्ज लोकसंख्या आशिल्लो भारत चौथी अर्थीक महासत्ता आसा. अर्थवेवस्थेंत भारत आतां तिसरे सुवातेर पावतलो. खेळ तशेंच हेर मळार नव्यो सुविधा जायत आसात. भारतीय ऑलिंपीक संघटणा फुडल्या वर्सा २०३६च्या ऑलिंपिका खातीर बोली मागयतली. भारत बोली सादर करतलें आनी भारताक यजमानपद फावो जातलें.
खेळां खात्या खातीरची अर्थसंकल्पी तजवीज ८६ कोटी वेल्यान ३४०० कोटींचेर पावल्या. खेळां मळावेलो खर्च ६०० कोटी वेल्यान ३ हजार कोटींचेर पावला. देशांत ११०० खेलो इंडिया केंद्रां आसात. गोंयां सयत देशांत संवसारीक पावंड्या वेल्यो सर्ती जायत आसात. सरकाराच्या योग्य धोरणाक लागून सगळ्या खेळांत नवे खेळगडे तयार जायत आसात, अशें अनुरागसिंग ठाकूर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
