भांगरभूंय | प्रतिनिधी
नवी दिल्ली/ पणजीः केंद्रीय माध्यमीक शिक्षण मंडळान राष्ट्रीय शिक्षण धोरण २०२० (एनईपी) खाला शाळेच्या शिक्षणांत क्रांतीकारी बदल केल्यात. ह्या बदलां मदीं गोंयकारां खातीर एक व्हड अभिमानाची गजाल म्हणल्यार, २०२६-२७ ह्या शिक्षणीक सत्रापसून यत्ता णववेच्या अभ्यासक्रमांत ‘कोंकणी’ भाशेचो अधिकृत आसपाव केला. फकत कोंकणी न्हय, तर डोंगरी, मैथिली आनी संथाली हांचो आस्पाव जाल्ल्यान भारताच्या संविधानाच्या आठव्या अनुसुचींतल्यो सगळ्यो २२ राजभासो आतां सीबीएसईच्या पर्यायांनी उपलब्ध आसात. ह्या निर्णयाक लागून कोंकणी भाशेक राष्ट्रीय पांवड्यार नवी माची मेळ्ळ्या. त्री भाषी सुत्री आनीक प्रभावीपणान चालीक लावपाचे दिकेन हें एक व्हड पावल मानतात.
बिरेस्तारा सीबीएसईन जाहीर केल्ल्या नव्या अभ्यासक्रम येवजणे प्रमाण आतां यत्ता सवे सावन ‘तिसरी भास’ (आर ३) शिकप सक्तीचें केलां. सद्याचे शिक्षण वेवस्थेंत विद्यार्थी फकत दोन भासो शिकतात, पूण नव्या धोरणांतल्यान धावे मेरेन तीन भासांचो अभ्यास करप सक्तीचें थारतलें. हातूंत दरेका विद्यार्थ्यान उण्यांत उण्यो दोन भारतीय भासो शिकप अपेक्षीत आसा. सीबीएसईचे अध्यक्ष राहुल सिंग हांणी स्पश्ट केल्ले प्रमाण ह्या वर्सा सावनच सवेच्या वर्गा खातीर तिसरे भाशेचीं पाठ्यपुस्तकां उपलब्ध करतले.
२०३१ वर्सा जेन्ना हे विद्यार्थी १० वेची बोर्ड परिक्षा दितले तेन्ना तांकां तिसरे भाशेची परिक्षा दिवप सक्तीचें आसतलें. हें दीर्घकाळ नियोजन भारतीय भासांच्या संरक्षणाक व्हड चालना दितली. नव्या नेमा प्रमाण इंग्लीश ही आतां ‘विदेशी भास’ मानतले. देखून २०३१ वर्सा धावेची परिक्षा दिवपी विद्यार्थ्यांक एकाच वेळार इंग्लीश आनी खंयचीय दुसरी परकी भास अश्यो दोनूय भासो घेवंक मेळच्यो नात. कारण नव्या धोरणांत फकत एकेच परकी भाशेक परवानगी दिल्या.
कोंकणी भाशेविशीं उलोवपाचें म्हणल्यार, गोंय आनी देशाच्या हेर वाठारांनी सीबीएसई शाळांनी आतां यत्ता णववे पसून कोंकणी हो एक स्वतंत्र विशय म्हूण शिकयतले. हे खातीरचें शिक्षणीक सामान आनी पाठ्यपुस्तकां नॅशनल कौन्सिल ऑफ एज्युकेशन रिसर्च अँड ट्रेनिंगचे मजतीन विकसीत करतात. ह्या निर्णयाक लागून कोंकणी साहित्याचो आनी व्याकरणाचो अभ्यास राष्ट्रीय पांवड्यावेल्या विद्यार्थ्यां मेरेन पावतलो.
गोवा कॅन आनी राज्यांतल्या वेगवेगळ्या शिक्षणीक संस्थांनी ह्या निर्णयाक येवकार दिवन फुडाराक कोंकणी भाशेचो प्रसार आनी रोजगाराची संद वाडटली असो विस्वास उक्तायला. परदेशांतल्या सीबीएसई शाळां खातीर मात भाशेच्या नेमांनी कांय सवलत दिल्या, तांकां एक तरी भारतीय मुळाची भास शिकोवप सक्तीचें आसतलें.
फकत भासो न्हय, सीबीएसईन अभ्यासक्रमांत हेर जायते म्हत्वाचे बदल केल्यात. कला, वेवसायीक शिक्षण आनी शारिरीक शिक्षण आतां णव्वी आनी धावेच्या वर्गा खातीर सक्तीचें केलां. २०२७-२८ वर्साच्या शिक्षणीक सत्रांतल्यान बोर्ड परिक्षेंत वेवसायीक शिक्षण सक्तीचो विशय आसतलो. तशेंच आधुनीक काळाची गरज वळखून ‘कॉम्प्युटेशनल थिंकिंग’ आनी ’आर्टिफिशियल इंटेलिजन्स’ (एआय) हे विशय तिसरी ते आठवेच्या वर्गांत सुरू केल्यात, आनी २०२९ वर्सा धावेचे बोर्ड परिक्षेंत सक्तीचे विशय म्हणून तांचो आस्पाव जातलो.
विद्यार्थ्यांचे कले प्रमाण गणित आनी विज्ञान ह्या विशयांत ‘प्रगत पांवडो’ वेंचपाचीय संद तांकां मेळटली. ह्या प्रगत पांवड्या खातीर वेगळी परिक्षा दितले आनी ताचें मूल्यमापन गूण पत्रकाचेर वेगळें दाखयतले. ह्या सगळ्या बदलांक लागून भारतीय शाळा शिक्षण वेवस्था चड मेकळी आनी बहुभाशीक जातली. कोंकणी भाशेचो आस्पाव जाल्ल्यान गोंयचे सांस्कृतीक अस्मितायेक खर्या अर्थान राश्ट्रीय मान्यताय मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
