२०२४ वर्सा ८ व्हड विमान अपघातांत ४०२ जाणांक मरण

भांगरभूंय | प्रतिनिधी

ह्या सप्तकांत कझाकिस्तान आनी दक्षीण कोरियेक जाल्ल्या दोन विमान अपघातांत २१७ जाणांक आपलो जीव वगडावचो पडलो. हांतलें ताजें प्रकरण दक्षीण कोरियाच्या मुआन हांगचें. जंय गिअर बॉक्सांत इबाड जाल्ल्यान विमान लँडिंग मजगतीं क्रॅश जालें. विमानांत १७५ प्रवासी आनी ६ क्रू मेंबर्स सयत १८१ लोक आशिल्ले. तांतल्या १७९ जाणांक मरण आयलें. कझाकिस्तानांत जाल्ल्या विमान अपघातांत ३८ जाणांक आपलो जीव वगडावचो पडलो.
२०२४ वर्सा ८ व्हड विमान अपघात जाले. जातूंत ४०२ लोकांक आपलो जीव वगडावचो पडलो. चडशे अपघात वायट हवामानाक लागून वा विमानाचें इंजीन इबाडिल्ल्यान जाल्यात. अशाच एका अपघातांत इराणचे अध्यक्ष इब्राहिम रायसी हांचे सयत खुबश्या फुडार्‍यांक मरण आयलें. आयज आमी जाणून घेवया अंदूं जाल्ल्या ८ भिरांकूळ विमान अपघातां विशीं.

२४ जानेवारी: रशियन लष्करी विमान अपघातांत ७४ जाणांक मरण

अंदूंचो पयलो व्हड विमान अपघात जानेवारींत रशियाच्या बेलगोरोड भागांत जाल्लो. ह्या अपघातांत ७४ जाणांक मरण आयिल्लें. अपघाताच्या वेळीर विमानांत ६५ युक्रेनियन कैदी आनी ९ रशियन क्रू मेंबर्स आशिल्ले.हे घडणुके उपरांत रशियेच्या संरक्षण मंत्रालयान युक्रेनचे क्षेपणास्त्र विमानाचेर पडिल्ल्याचें सांगिल्लें, तर युक्रेनान हाका रशियन कारस्थान म्हणिल्लें.

१२ मार्च : रशियेच्या इव्हानोवचो विमान अपघात

रशियाच्या इव्हानोवो ओब्लास्टांत इल्युशिन IL-७६ मालवाहू विमान कोसळ्ळें. ह्या अपघातांत १५ जाणांक मरण आयलें. हातूंत ७ प्रवासी आनी ८ क्रू मेंबर्स आशिल्ले. विमानाच्या एका इंजिनाक उजो लागिल्ल्यान हो अपघात जालो.

१९ मे : इराणच्या राष्ट्राध्यक्षांचे हॅलिकॉप्टर कोसळ्ळे

अंदूं मे महिन्यांत इराणचे राष्ट्राध्यक्ष इब्राहिम रायसी हांचें हॅलिकॉप्टर खराब हवामानाक लागून कोसळिल्लें. ह्या अपघातांत राष्ट्राध्यक्ष इब्राहिम रायसी आनी परराष्ट्र मंत्री हुसेन अमीराबदुल्लाहियान हांचे सयत ९ जाणांक मरण आयलें.
इराणच्या राष्ट्राध्यक्षांच्या ताफ्यांत ३ हॅलिकॉप्टर आशिल्ले आनी हातुंतले २ हॅलिकॉप्टर सुरक्षीत सुवातेर पाविल्ले. दाट धुक्यांतल्यान दोंगराळ वाठारांत पलतड मारतना हॅलिकॉप्टराचो अपघात जालो. इराणची राजधानी तेहरान सावन ६०० किलोमीटर अंतराचेर आशिल्ल्या अझरबैजानच्या शिमेर शार जोल्फा लागसारा हो अपघात जालो.

१० जून : मलावीच्या उपराष्ट्रपतींक विमान अपघातांत मरण

आफ्रिकन देश मलावीचे उपाध्यक्ष सॉलोस क्लाऊस चिलिमा हांकां विमान अपघातांत मरण आयलें. १० जुनाक बेपत्ता जाल्ल्या उपराष्ट्रपतींच्या विमानाचे अवशेश सांपडूंक ना. ह्या अपघातांत वायट हवामान कारणीभूत आशिल्ल्याचें सांगलें.

२४ जुलय: नेपाळ विमान अपघात

२४ जुलय २०२४ दिसा नेपाळांतल्या काठमांडू हांगच्या त्रिभुवन आंतरराष्ट्रीय विमानतळार सौरी एअरलायन्सचें विमान पोखरा हांगा वतना क्रॅश जालें. 9N-AME हे विमान सौर्य एअरलायन्सचें आशिल्लें. ह्या अपघातांत १८ जाणांक आपलो जीव वगडावचो पडलो. सकाळीं सुमार ११ वरांचेर त्रिभुवन विमानतळावेल्यान उड्डाण केले उपरांत कांय वेळाञतूच हो अपघात जालो. मरण आयिल्ल्यां मदले १७ सूर्या एअरलायन्सचे कर्मचारी आशिल्ले, जाल्यार उरिल्ले दोग जाण क्रू मेंबर्स आशिल्ले. हें २१ वर्सां आदलें विमान दुरुस्ती करून चाचणी खातीर व्हरताले.

९ ऑगस्ट : ब्राझीलाक जाल्ल्या अपघातांत ६२ जाणांक जीव वगडावचो पडलो

ब्राझीलांतल्या साओ पाउलो राज्यांतल्या विन्हेदो शारांत ९ ऑगस्टाक व्होईपास फ्लायट २२८३ क्रॅश जालें. ह्या अपघातांत विमानांतल्या सगळ्या ६२ जाणांकूय मरण आयिल्लें. ह्या विमान अपघाताचें कारण आजूनय कळूंंक ना.

२५ डिसेंबर : अझरबैजान विमान अपघातांत ३८ जाणांक मरण आयिल्लें

कझाकस्तानांतल्या अकताऊ हांगा २५ डिसेंबराक एक प्रवासी विमान कोसळ्ळें. ह्या अपघातांत ३८ जाणांक मरण आयलें. विमानांत ६२ प्रवासी आनी ५ क्रू मेंबर्स आशिल्लें. हें विमान अझरबैजान हांगच्यान रशियाच्या चेचन्या प्रांताची राजधानी ग्रोझनी वटेन गेल्लें. मात कझाक शार अकताऊ सावन सुमार ३ किमी अंतराचेर ताचें इमर्जन्सी लँडींग करचें पडलें. ह्या मजगतीं विमान कोसळ्ळें आनी ताचे दोन कुडके जाले. उपरांत ताका उलो लागलो.

२९ डिसेंबर : दक्षीण कोरियेक विमान अपघात, १७९ जाणांक मरण

दक्षीण कोरियेच्या मुआन विमानतळार जेजू एअरचें विमान कोसळ्ळें. विमानांत १७५ प्रवासी आनी ६ क्रू मेंबर्स सयत १८१ लोक आशिल्ले. १७९ कुडी भायर काडल्यो. जाल्यार २ जाणांक वाटावपाक येस आयलें.