भांगरभूंय | प्रतिनिधी
पणजीः भाजपा आड वायट उतरां काडपी विजय सरदेसाय हांणी २०१७ चे विधानसभा वेचणुकेंत वेंचून येतकत भाजपाक तेंको दिवन गोंयकारां वांगडा प्रँक केल्लो. होच प्रँक विजय सरदेसाय २०२७ चे वेचणुकेंत करतलो. देखून विजयाचेर विस्वास दवरचे पयलीं गोंयकारांनी १०० खेपे चितचें, अशी टिका आरजीपीचे मुखेली मनोज परब हांणी सरदेसाय हांकां प्रत्युत्तर दितना केलां.
आरजीपीन गोंयकारां वांगडा प्रँक केला आनी हे प्रँकस्टरा वांगडा युती कसली, असो थोमणो गोवा फॉरर्वडचे अध्यक्ष विजय सरदेसाय हांणी मनोज परब हांकां मारिल्लो.
सरदेसाय हांकां जाप दितना परब हांणी म्हणलें, आमकां प्रँकस्टर म्हण ह्याच विजय सरदेसाय २०१७ त सगळ्या गोंयकारां वांगडा प्रेंक केल्लो. भाजपा आड वेंचणुकेक उबो रावन तो स्वता वेंचून आयल्लो. आपल्या आमदारांक वेंचून हाडिल्ले आनी सगळ्या गोंयकारां कडेन प्रँक करून भाजपाक तेंको दिवन भाजपाचें सरकार घडयल्लें. आतां होच सरदेसाय प्रँकाच्यो गजाली करता. आमी सरदेसाय हांचो पोपट केल्ल्या कारणान ताचें मन दुखवलां आनी तो फुर्योज जाला. खुबशे बनावट सोशल मिडया अकावंट फातोड्डेच्यान चलोवन तो स्वताचो बचाव करता, असो गंभीर आरोप परब हांणी केलो.
फक्त २०१७ त न्हय तर २०२५ त कॉंग्रेशीच्या फुटीर आमदारांक परत पक्षांत घेवन आनीक एक प्रँक केलासा. गोंयकारांनी सरदेसायाच्या उतरांचेर विस्वास दवरचे पयली १०० खेपे विचार करचो. हो एक प्रँकस्टर जावन आसा. २०२७ तय तो प्रँक करतलो, असो थोमणो परब हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
