भांगरभूंय | प्रतिनिधी
बंगळुरू : ‘म्हज्या हाॅटेल वेवसायांत गुंतवणूक करश्यात जाल्यार तुमकां व्हडलें कमिशन मेळटलें. देड हजार भरात, मागीर लिंक दिसता ताचेर अॅप डावन लोड करात. तुमकां सुरवातेक इल्ले इल्ले पयशे मेळटले. ३०० रुपया जाले काय ते काडपाक मेळटले. मागीर जितले भरता ते प्रमाण व्याज मेळटलें…’ अशें एका गोऱ्या मनशान सांगतकच २०० लोकांनी धडाधड गुंतवणूक केली.
सुरवातेक गुंतवणुकदारांक थोडें काम दिलें. हाॅटेलाची प्रोफायल करपाक सांगली. टायपिंगेचें काम दिलें. सुरवेक गुंतवणुकदारांच्या खात्यांत ३०- ३० रुपया जमा जावपाक लागले. मागीर तांकां त्यो गोरेल्यान आनीक पयशे भरपाक सांगलें. थोड्यांनी पांच ते १० लाखां वयर रक्कम भरली.
बंगळुरू, तुमकूरु, मंगळूरु आनी हवेरी हांगां हो सायबर फटवणुकीचो प्रकार जालो. एका हवेरींत १५ परस चड लोकांनी आपले पयशे वगडायल्यात. रक्कम थोडी न्हय, तर २ कोटी रुपया.
हो गोरेलो मनीस सादो सुदो न्हय…. तो जावन आसा अमेरिकेचो अध्यक्ष डोनाल्ड ट्रम्प. एआयचे मजतीन ताचो व्हिडियो करून कांय ठकसेनांनी लोकांक फटयल्यात. पुलीस आतां फुडलो सोद घेत आसात. ट्रम्पाक हें कळत जाल्यार ताची प्रतिक्रिया कितें आसतली काय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
