भांगरभूंय | प्रतिनिधी
नवी दिल्ली, खबरां संस्था : अंटार्क्टिकांत उणें ४० अंश तापमान, आशिकुशीक शेकड्यांनी किलोमिटर बर्फ आनी बर्फाचें वारें. तातूंत एकलोच मनीस २०० किलांची स्लेज ओडटालो. ही फिल्मी कथा न्हय, आव्हानां स्वीकारपी त्या मनशाच्या धैर्याचें आनी उत्कटतेचें उदाहरण आसा.
हें उदाहरण ४० वर्सां पिरायेच्या इंडो- अमेरिकन, आदले सागरी अधिकारी अक्षय अजय नानावटी हांणी सादर केलां. ह्या दिसांनी ते अश्या कठीण प्रवासाक गेल्यात जाचो विचार लेगीत केल्यार आंगार कांटो येता. अक्षयान ८ नोव्हेंबर सावन अंटार्क्टिकांत ‘द ग्रेट सोल क्रॉसिंग’ नांवाचो ११० दिवसांचो प्रवास सुरू केला. हो प्रवास तांकां एकट्याकूच पुराय करपाचो आसा.
हे कोस्ट- टू- कोस्ट स्की मोहिमेंत अक्षय ४०० पौंड (१८१ किलोग्रॅम) वजन ओडटना १,७०० मैल (२७३५.८ किलो मिटर) अंतर हुपतले. जर ते हातूंत येसस्वी जाले जाल्यार ते धर्तरेवेलो सगळ्यांत थंड, सुकें, वादळ आनी सगळ्यांत किण्णबिण्ण खंड एकट्यान पार करपी पयली व्यक्ती थारतले.
चार वर्सांच्या खर प्रशिक्षणा उपरांत ते प्रवासा खातीर सज्ज जाले. वेवसायान उद्देजक, म्हणयारो आनी लेखक आशिल्ल्या अक्षयाची ही मोहीम चार वर्सांच्या खर प्रशिक्षणाचें फळ आसा. हातूंत तांणी फकत शरिरीक तंदुरुस्ती कडेन लक्ष दिवंक ना, जाल्यार ह्या आव्हाना खातीर तांणी मानसीक नदरेनूय तयारी दवरल्या.
हो प्रवास कसोच सोंपो जावचो ना. अक्षयचे ध्रुवीय मार्गदर्शक, लार्स एबेसन म्हणटात, ही मोहीम सामकी कठीण आनी अद्वितीय शारिरीक कार्य आसा, जें कोणेंच आजून मेरेन एकट्यान करूंक ना. सगळ्यांत आव्हानात्मक पैलू म्हणल्यार ते मानसीक आनी शरिरीक नदरेन बरेंच चेंपण हाडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
