भांगरभूंय | प्रतिनिधी
पणजी : राज्यांतल्या मतदारांची विशेश खोलायेन फेरतपासणी (एसआयआर) पुराय जाले उपरांत निमाणे वळेरेंतल्यान वट्ट १ लाख २७ हजार ४६८ मतदारांचीं नांवां सोडल्यांत. निमाणे मतदार वळेरेंत १० लाख ५७ हजार ५६६ मतदारांचीं नांवां दवरल्यांत. हातूंत ५ लाख ११ हजार ४३६ दादले, ५ लाख ४६ हजार १२१ बायलां, जाल्यार ९ तृतीय पंथी मतदार आसात. सांडिल्ल्या नांवां विशीं कितेंय आक्षेप आसल्यार फुडल्या १५ दिसांनी जिल्लोधिकारी कार्यालयांत अर्ज करपाक मेळटले अशी म्हायती मुख्य वेंचणूक अधिकारी संजय गोयल हांणी दिली. शेनवारा पणजे जाल्ले पत्रकार परिशदेंत ते उलयताले.
राज्यांत एसआयआर प्रक्रिया २७ ऑक्टोबर २०२५ दिसा सुरू जाली. तेन्ना मतदार वळेरेंत ११ लाख ८५ हजार ३४ मतदारांचीं नांवां आशिल्लीं. १६ डिसेंबर २०२५ दिसा जारी केल्ले मसुदो वळेरेंतल्यान मरण आयिल्ल्या, हाजीर नाशिल्ल्या, दोन नांवां आसप वा नामो कायमचो बदलिल्ल्या १ लाख ४२ मतदारांचीं (एएसडीडी) नांवां सोडल्यांत. मसुदो वळेरेंत ९ लाख २ हजार ५८९ मॅप जाल्ले, तशेंच १ लाख ८२ हजार ४०३ मॅप जावंक नाशिल्ल्या अशा वट्ट १० लाख ८४ हजार ९९२ मतदारांचीं नांवां आशिल्लीं. मॅपिंग जावंक नाशिल्ल्या मतदारांक नोटीस धाडून हे विशीं सुनावण्यो घेतल्यो.
तशेंच मॅप जाल्ल्या वट्ट मतदारां मदल्या ५८ हजार ९२३ मतदारांकूय कांय अनियमितता सांपडिल्ल्यान नोटीस धाडिल्ल्यो. सुनावणे उपरांत अनियमितताय आशिल्ल्या तशेंच मॅप जावंक नाशिल्ल्या वट्ट ३८ हजार ७८० मतदारांक अपात्र थारयल्या. मसुदो वळेरी प्रसिद्ध जाले उपरांत अर्ज ६ वरवीं १२ हजार १६६ मतदारांचीं नांवां निमाणे मतदार वळेरेंत घातलीं. जाल्यार ३९ हजार ५९२ सोडल्यांत. हाका लागून मसुदो वळेरेंतल्यान वट्ट सोडिल्ल्या मतदारांची संख्या २७ हजार ४२६ (२.५३ टक्के) इतली आसा. सगल्या राजकी पक्षांच्या प्रतिनिधींक मतदारासंघ तशेंच बूथ प्रमाण सोडिल्ल्या नांवांची, तशेंच निमाणी वळेरी दिल्या. निमाणी वळेरी सीईओ गोवा हे वेबसायटीचेरूय अपलोड केल्या अशें गोयल हांणी सांगलें.
आंकडेवारी
तारीख / मतदार संख्या
२७ ऑक्टोबर २०२५ / ११ लाख ८५ हजार ०३४
१६ डिसेंबर २०२५ (मसुदो वळेरी) / १० लाख ८४ हजार ९९२.
२१ फेब्रुवारी २०२६ (निमणी वळेरी) / १० लाख ५७ हजार ५६६.
१६ हजार पुर्तुगेज पासपोर्ट धारक
गृह मंत्रालय, पासपोर्ट कार्यालय तशेंच एफआरआरओ हांचे कडल्यान आयिल्ले म्हायती प्रमाण, राज्यांत १६ हजार ७२१ जाणां कडेन पुर्तुगेज पासपोर्ट आसात. हातुंतल्या ४२८ जाणांचीं नांवां मसुदो वळेरेंत आयिल्लीं. हातुंतल्या ४२० जाणांचीं नांवां सोडल्यांत. हेर ८ जाणांचीं नांवां बेगीनूच सोडटले.
फुडली प्रक्रिया
निमाणे वळेरे विशीं फुडल्या पंदरा दिसांनी जिल्लोधिकारी कार्यालया कडेन आक्षेप नोंद करपाक मेळटलो. तरी समाधान जावंक ना जाल्यार ताचे फुडल्या ३० दिसांनी मुखेल वेंचणूक अधिकारी कार्यालयांत हरकत घेवपाक मेळटली अशें गोयल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
