भांगरभूंय | प्रतिनिधी
नवी दिल्ली, खबरां संस्था : १ मे २०२५ सावन फुकट मर्यादे उपरांत एटीएमांतल्यान पयशे काडप म्हारग जातलें. रिझर्व्ह बँकेन (आरबीआय) एटीएम शुल्कांत वाड करपाक मान्यताय दिल्या. हाचो अर्थ एटीएमांतल्यान फुकट पयशे काडपाची मर्यादा सोंपल्या उपरांत तुमी दरेक फावटीं पयशे काडटात तेन्ना तुमच्या बोल्साचेर मात्सो चड भार पडटलो.
एटीएमांतल्यान पयशे काडपाचें शुल्क कितलें वाडलें?
आतां मेरेन, फुकट वेव्हार मर्यादा सोंपले उपरांत एटीएमांतल्यान पयशे काडपा खातीर २१ रुपया घेताले. मात १ मे २०२५ सावन दरेका हेर वेव्हारा खातीर २३ रुपया दिवचे पडटले. म्हळ्यार जर तुमी फुकट मर्यादे उपरांत एटीएमांतल्यान पयशे काडल्यार तुमकां दरेक फावटीं २ रुपया चड दिवचे पडटले. जे लोक म्हयन्यांतल्यान जायते फावटीं पयशे काडपा खातीर एटीएम वापरतात तांचे खातीर हो खर्च वाडटलो.
फुकट वेव्हार मर्यादा आसा तशीच!
फुकट मर्यादे विशीं कसलोच बदल करूंक ना. हाचो अर्थ असो, गिरायक आजूनय दर म्हयन्याक तांच्या बँकेच्या एटीएमांतल्यान पांच फावटीं फुक वेव्हार करपाक शकतात. तशेंच, हेर खंयचे बँकेच्या एटीएमांतल्यान ३ फावटीं फुकट वेव्हारांची सुविधा मेट्रो शारांत आनी ५ वेळा फुकट वेव्हारांची सुविधा नॉन-मेट्रो शारांत उपलब्ध आसतली. जर तुमी थारोवन दिल्ले मर्यादे परस चड फावटीं पयशे काडल्यार नवो शुल्क लागू जातलो.
ल्हान बँकांच्या गिरायकांचेर चड परिणाम
एटीएम शुल्कांत वाड जाल्ल्यान सगल्यांत चड परिणाम ल्हान बँकांच्या गिरायकांचेर जातलो, अशें मत तज्ञांचें आसा. ल्हान बँकांकडेन उणे एटीएम आसतात आनी ते एटीएम व्हडल्या बँकांच्या नेटवर्कचेर निंबून आसतात. अशे परिस्थितींत, जर फुकट वेव्हाराची मर्यादा सोंपल्यार ह्या गिरायकांक दर फावटीं चड पयशे दिवचे पडपाक शकतात. अशे परिस्थितींत, चड शुल्क नाका जाल्यार कांय गिरायकां तांच्यो बँको बदलपाचो विचार करपाक शकतात. जाका लागून ते अदीक फुकट वेव्हारांची सुविधा मेळपाक शकतली.
एटीएम शुल्क वाडोवपाचें कारण कितें?
बँको आनी थर्ड पार्टी एटीएम ऑपरेटर (जशें व्हायट-लेबल एटीएम कंपन्यो) जायत्या काळा पसून शुल्क वाडोवपाची मागणी करताले. तांणी एटीएम चलोवपाचो खर्च मात्सो वाडला आनी तांकां लुकसाण जाता अशें सांगिल्लें. हाचेर, नॅशनल पेमेंट्स कॉर्पोरेशन ऑफ इंडियान आरबीआयक शुल्क वाडोवपाची शिफारस केल्ली, ती आतां मंजूर केल्या. हाका लागून हो नवो नेम १ मे २०२५ सावन लागू जातलो.
चड पयशे कट जावपा पसून कशे चुकयतले?
जर तुमी म्हयन्याक एकदां वा दोन फावटींच पयशे काडटात जाल्यार तुमकां काळजी करपाची गरज ना. मात जे लोक एटीएमांतल्यान सेगीत पयशे काडटात तांचे खातीर कांय सोप्यो टीप्स आसात त्यो पळोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
