भांगरभूंय | प्रतिनिधी
पणजीः केंद्रीय खेळा आनी युवा वेव्हार मंत्रालयाचे जोड पालवान गोंय खेळां आनी युवा वेव्हार खातें २२ वो राज्य युवा महोत्सव १ ते २ डिसेंबर मजगतीं घडोवन हाडटले. दोन दीस चलपी ह्या युवा महोत्सवाक वेगवेगळ्या तरांची सर्त घडोवन हाडटले. हे सर्तींत पयलें इनाम फावो जाल्ल्या जैतिवंताक राष्ट्रीय युवा महोत्सवांत वाटेकार जावपाक मेळटलें, अशी म्हायती खेळां आनी युवा वेव्हार मंत्री रमेश तवडकार हांणी दिली.
पणजे आपयल्ले पत्रकार परिशदेंत खेळां मंत्री रमेश तवडकार उलयताले. ह्या वेळार खेळां आनी युवा वेव्हार संचालक अजय गावडे आनी हेर मानेस्त हजर आशिल्ले.
प्रधानमंत्री नरेंद्र मोदी हांचे दुरदृश्टी आशिल्ले विकसित भारत २०४७ हे सकल्पनेक अनुसरून २२वो राज्य युवा महोत्सव हो १ ते २ डिसेंबर मजगतीं कला अकादमी पणजे हांगासर घडोवन हाडटले, अशें तवडकार हांणी सांगलें.
गोंय सरकारान राज्य युवा धोरण अंमलात हाडलां. ह्या धोरणा वरवीं विवीध मळांचेर वावुरपी तरणाट्यांची प्रतिभा विकसीत करपा खातीर वेगवेगळे उपक्रम युवा वेव्हार खातें घडोवन हाडटा आनी राज्य युवा महोत्सव हाचोच एक भाग जावन आसा. १ डिसेंबराक कार्यवाळीचें उक्तावण जातलें, जाल्यार २ डिसेंबराक समारोप सुवाळो जातलो. दोनूय सुवाळ्यांक मुख्यमंत्री डॉ़ प्रमोद सावंत हजर आसतले, अशें तवडकार हांणी सांगलें.
पयल्या दिसा राज्य पांवड्यार लोक नाच, फोटोग्राफी, रांगोळी आनी सायन्स मेला घडोवन हाडटले. जाल्यार दुसर्या दिसा लोक संगीत, काणी बरोवप, कविता बरोवप आनी पेंटींग सर्त घडोवन हाडटले. हे सर्तींनी पयलें इनाम फावो जाल्ल्या सर्तकांक दिल्ली हांगा भारत मंडपांत जावपी राष्ट्रीय युवा महोत्सवाक गोंय राज्या वतीन वाटेकार जावपाची संद मेळटली, अशी म्हायती तवडकार हांणी दिली.
देखून हे सर्तींत वाटेकार जावपा खातीर सगळ्या उच्च माध्यमीक विद्यालयांनी आनी महाविद्यालयांनी वाटेकार जावचें. तशेंच जे सर्तीत वाटेकार जायनात तांणी हे कार्यावळींत हजेरी लावन कार्यावळीची सोब वाडोवची, असो उलो तवडकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
