भांगरभूंय | प्रतिनिधी
नवी दिल्ली, खबरां संस्था ः अर्थमंत्री निर्मला सीतारमण हांणी २०२४ वर्साच्या अर्थसंकल्पांत शिक्षण आनी तरणाट्यां खातीर जायत्यो घोशणा केल्यात. नोकरी आनी कुशळटाय उदरगती संबंदी ५ पीएम पॅकेज येवजणेचो तांणी अर्थसंकल्पांत उल्लेख केला. एक येवजण आसा, जातूंत १००० उद्देगीक प्रशिक्षण संस्थांक अद्ययावत करतले आनी दर वर्सा २५००० विद्यार्थ्यांक फायदो जातलो. ५ वर्सांत १ कोटी तरणाट्यांक कुशळटाय उदरगत प्रशिक्षण दितले. ५०० मुखेल कंपनींनी १ कोटी तरणाट्यांक इंटर्नशिप दितले. इंटर्नशिपा वेळार प्रशिक्षीतांक म्हयन्याक ५ हजार रुपया भत्तो मेळटलो.
दर म्हयन्याक पांच हजार रुपया?
म्हयन्याक ५००० रुपया मेळोवपाची पात्रताय कितें आसूंक जाय असो प्रस्न जायते विचारतात. ही येवजण प्रधानमंत्री पॅकेजीचोच एक भाग. सरकार एक येवजण सुरू करपाचें आसा, जी पयल्या ५०० कंपनींनी १ कोटी भारतीय तरणाट्यांक इंटर्नशिप दितली. ही येवजण ५ वर्सां खातीर आसतली अशें अर्थमंत्रीन स्पश्ट केलां. हे तरणाटे १२ म्हयने प्रशिक्षण संस्थेंत शिकून फुडारा खातीर तयारी करतले. ह्या काळांत तांकां दर म्हयन्याक पांच हजार रुपया इंटर्नशिप भत्तो दितले. हाचे भायर ६ हजार रुपयांचो एकदांच आदार भत्तोय दितले.
शिक्षणाच्या काळांत वा शिक्षण पुराय केल्या उपरांत इंटर्नशिप करून खंयच्याय मळार करिअर करपाक सोदपी विद्यार्थ्यांक ताचो फायदो जातलो. पूण हाचे खातीर पिरायेची गरज आसता. हें प्रशिक्षण २१ ते २४ वर्सां पिरायेच्या गटांतल्या विद्यार्थ्यांक दितले. जांणी आजून नोकरी करूंक ना वा पूर्णवेळ शिक्षण घेवंक शकनात तांकांय हे शिश्यवृत्तीचो लाव मेळटलो. प्रशिक्षणाच्या वेळार जाल्लो खर्च कंपनीच घेतली. हाचे भायर इंटर्नशिप खर्चांतले १० टक्के खर्च कंपनीच्या सीएसआर निधींतल्यान घेतले.
फर्स्ट टायम एम्प्लॉयमेंट येवजण
‘फर्स्ट टायम एम्प्लॉयमेंट’ येवजण ही पीएम पॅकेजीचो एक भाग. हाचे खाला ईपीएफओंत पयलेच खेपे नांव नोंदणी करपी लोकांचो पगार १ लाख रुपया परस उणो आसल्यार तांकां १५ हजार रुपया मजत दितले. ही रक्कम सरळ बँक खात्यांत जमा जातली. हे येवजणेंतल्यान २१० लाख तरणाट्यांक मजत जातली.
आनिकूय एक येवजण म्हळ्यार उत्पादनांत रोजगार निर्माण करप. पयलेच खेपे उत्पादन क्षेत्रांत येवपी कर्मचार्यांक ईपीएफओ ठेवींच्या आदाराचेर पयल्या ४ वर्सां खातीर प्रोत्साहन भत्तो दितले. ३० लाख तरणाट्यांक हाचो फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
