भांगरभूंय | प्रतिनिधी
आतां ३ हजारांचे सुवातेर ३,०७५ रुपया फारीक करचे पडटले
नवी दिल्ली: फुडल्या म्हयन्या सावन म्हळ्यार १ एप्रील सावन राष्ट्रीय म्हामार्गांचेर प्रवास करप मात्शें म्हारग जातलें. रस्तो येरादारी मंत्रालयान FASTag वर्सुकी पासाचे दर २.५ टक्क्यांनी वाडोवपाचें थारायलां. आतां खाजगी वाहन मालकांक वर्सुकी पासा खातीर ३ हजार रुपया बदला ३,०७५ रुपया दिवचे पडटले. ह्या पासांतल्यान गाडी वापरप्यांक देशभरांतल्यान २०० टोल प्लाझांचेर थांबनासतना प्रवास करपाक मेळटा.
वर्सुकी नियाळा प्रमाण वाडिल्लें दर
रस्तो येरादारी मंत्रालयाच्या अधिकार्यांच्या म्हणण्या प्रमाण जेन्ना FASTag वर्सुकी पास सुरू जालो तेन्ना दर वर्सा दरांचे नियाळ आनी बदल करपाची तरतूद ताच्या अधिसुचोवणेंत केल्ली. ही वाड त्याच वर्सुकी पुनरावलोकन प्रक्रियेचोच एक भाग. देशभरांतल्या हायवे टोल दरांत बदल करपा खातीर थारायिल्ल्या सुत्राच्या आदाराचेर हे खेपे २.५ टक्क्यांनी वाड केल्या.
५२ लाखां परस चड लोक ह्या पासाचो वापर करतात
सरकारान हो खाशेलो वर्सुकी पास १५ ऑगस्टा सावन सुरू केल्लो आनी ताका अपेक्षा परस खूब बरो प्रतिसाद मेळ्ळा. आतां मेरेन ५२ लाखां परस चड हायवे कार वापरपी हे येवजणेंत आसपाव जाला. ह्या पासाचें सगल्यांत व्हड विशिश्ट म्हळ्यार तो एका वर्सांत कितलोय वेळ रिचार्ज करूं येता आनी लांब प्रवास करपी प्रवाशां खातीर तो खूब फायद्याचो थारतलो.
३१ मार्च मेरेन पोरन्या दरान खरेदी करपाची संद
तुमी हायवेचेर सेगीत प्रवास करतात आनी ह्या वाडिल्ल्या दरांतल्यान वाटवपाची इत्सा आसा जाल्यार तुमकां ती संद आसा. अधिकार्यांनी सांगलें, जे वापरकर्ते ३१ मार्च मेरेन आपलो पास रिचार्ज करतले वा नवीन पास विकत घेतले, तांकां तो पोरण्या दरांत म्हळ्यार ३,००० रुपयांनीच मेळटलो. १ एप्रिलचे सकाळ पसून सिस्टमांत नवें दर अपडेट करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
