भांगरभूंय | प्रतिनिधी
कागदपत्रां तयार करून दवरचीं म्हूण मुख्यमंत्र्यान मारलो उलो
पणजी : १९७२ वर्सां आदलीं सर्व्हेचेर दाखयल्लीं घरां अधीकृत करपा खातीरचे अर्ज सप्टेंबर सावन उपलब्ध जातले. लोकांनी कागदपत्रां तयार करून दवरचीं आनी ह्या परिपत्रकाचो व्हडा प्रमाणांत लाव घेवचो, असो उलो मुख्यमंत्री डॉ. प्रमोद सावंत हांणी मारला.
सांखळे मतदारसंघांत पाळी पंचायत इमारतीच्या बुनियादी फातोर बसोवपाच्या सुवाळ्यांत मुख्यमंत्र्यांनी ही म्हायती दिली. १९७२ वर्सा आदलीं जायतीं घरांं सर्व्हेचेर दाखयल्या मात तीं अधीकृत नात. हीं घरां वाटोवपा खातीर सरकारान परिपत्रक जारी केलां. जरी परिपत्रक जारी केलां तरी आजून मेरेन अर्ज उपलब्ध जावंक ना. पयलीं उपजिल्लोधिकार्यां कडेन अर्जा सयत कागदपत्रां सादर करून प्रमाणपत्र घेवचें पडटलें. घर कायदेशीर आशिल्ल्याचें प्रमाणपत्र उपजिल्लोधिकार्यान दिले उपरांत पंचायत/ नगरपालिके कडेन घर अधीकृत करपा खातीर अर्ज करचो पडटलो. अर्जा सयत १ हजार रूपयांचें शुल्क फारीक करचें पडटलें. चडांत चड १ हजार चौखण मिटर जाग्यावेलीं घरां अधीकृत करपाचे अधिकार पंचायत/ नगरपालिकांक दिल्यात.
हे विशीं दोन स्वतंत्र परिपत्रकां सरकारान जारी केल्यांत. १९७२ पयलींची ९८ टक्के अनधीकृत घरां गोंयकारांची आसा, अशेंय मुख्यमंत्र्यांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
