भांगरभूंय | प्रतिनिधी
पणजीः गोंय कोयर वेवस्थापन महामंडळ सुमार १७० कण्णम गाडयांचो विलो लावपा खातीर पावणी करतलें. १० जुलयाक आल्तिन जीआरपी मैदानाचेर ही पावणी जातली.
सुमार ३२ सरकारी खाती, महामंडळ आनी स्वायत्त संस्थाच्यो १७० कण्णम गाडयां मदल्यो १२८ गाडयो १५ वर्सां आदल्यो आनी ४२ गाडयो १५ वर्सां सकयलो आसात. हीं ४२ वाहनां सामान्य नागरीकां खातीर पावणेंत वाटेकार जावन चडांत चड पावणी लावन विकत्यो घेवपाक मेळटात. पूण जीं वाहनां १५ वर्सां पोरणीं आसात तांचो केंद्र सरकाराच्या स्क्रॅपींग धोरणा प्रमाण वापर करपाक मेळना आनी तांचो विलोय लावचो पडटा. हे खातीर फकत नोंदणीकृत वाहन स्क्रॅपींग सुविधा (आरव्हीएसएफ) आशिल्ल्या कंत्राटदाराक पावणी लावपाक मेळटली, अशी कळोवणी महामंडळान केल्या.
हीं वाहनां जे सुवातेर आसात थंयसर वचून ह्या वाहनांची पळोवणी करची आनी ह्या वाहनां विशींची कसलीच कागाळ करपाक मेळचीना. हीं वाहनां खयचे सुवातेर उबीं केल्यांत हाचें लोकेशन कळोवणेंत बरयलां आनी इत्सुकांनी संबंदीत सुवातेर वचून १ जुलय २०२५ ते ९ जुलय २०२५ मजगतीं सकाळीं ९.३० ते सांजे ५.४५ वरां मदीं वचून तपासणी करची. ह्या वाहनांचेर लोट नंबर बरयलो आसतलो तो नंबर नोंद करचो.
ह्या वाहनां खातीरची पावणी १० जुलयक गोंय राखीव पुलीस दळाचे इमारतीचे गझेट अधिकारी इन्सटीट्युट सालांत जातली. सकाळीं १० ते दनपरां ३ मजगतीं लोट नंबर बरोवन वाहनांचे थारयिल्ले किमती परस चड बोली लावन सुवातेर दवरिल्ल्या निविदा पेटुलांत घालची. दनपरां ३.३० वरांचेर निविदा पेटूल उक्तें करून जांणी चड पावणी लायल्या तांची निवड जातली आनी पयशे भरले उपरांत त्याच दिसा वाहन ताचे सुवाधीन जातलें. एक मनीस एक वा दोन परस चड वाहनां खातीर पावणी लावपाक शकता.
खण खातें, प्रोव्हेदोरीया, कोम्युनिदाद प्रशासकाची कचेरी, शेतकी संचालनालय, उद्देग, वेवसाय आनी वाणीज्य खातें, खादी आनी ग्राम उद्देग मंडळ, गोंय तियात्र अकादमी, भौशिक बांदकाम खातें, पर्यावरण आनी हवामान बदल खातें, उजो पालोवपी दळाचे मोटरसायकली, एम्ब्युलन्स आनी उजो पालोवपी ट्रक, कामगार आनी रोजगार आयुक्त, बंदर कप्तान खातें, जीसुडा, पणजी महानगरपालिका, कला आनी संस्कृती संचलनालय, वीज खातें, राज भवन, पोलिस खातें, वेवसायिक कर आयुक्त, भलायकी संचलनालय, सामान्य प्रशासन खातें, नगर नियोजन खातें, वजन आनी माप खातें, गोंय पुर्नवसन महामंडळ, एमपीडीए, इन्फो टॅक महामंडळ, कला अकादमी, गोंय मनीस हक्क आयोग आनी गोंय फलोत्पादन महामंंडळाच्या वाहनांचो हातूंत आस्पाव आसा.
परवडपी दरांत वाहनां
चडश्या सामान्य प्रशासन खात्याच्यो १५ वर्सा सकयल्यो मोटारी जश्यो की टोयोटा इनोव्हा द५० हजार ते देड लाख मेरेन उण्यात उणी किंमत आसा, रेनोल्ट डस्टर हांची उण्यात उणी किंमत ५० ते ६० हजार, होंडा सिटी, मारूती एस एक्स ४, फोल्क्सवेगन वेन्टो आनी फोर्ड फिएस्टा ह्यो २४ हजार ते ५५ हजार जाल्यार दुचाकी स्प्लेंडर आनी पल्सर हांची ४ हजार मेरेन उण्यात उणी किंमत आसा.
आदले मुख्यमंत्री लक्ष्मीकांत पार्सेकार हांचें शासकीय वाहन पावणेक
आदले मुख्यमंत्री लक्ष्मीकांत पार्सेकार हांची वयक्तीक शासकीय मोटार महीन्द्रा एक्सयुव्ही ३०० हें वाहन पावणे खातीर काडलां. जीए ११ जी ०६४५ हें मोटार सामान्य प्रशासन खात्यान शासकीय कामा खातीर लक्ष्मिकांत पार्सेकार हांकां दिल्लें. हें वाहन १५ वर्सां सकयलें आसा आनी सामान्य लोकांक पावणी लावन तें विकतें घेवपाक मेळटा. ह्या वाहनांची उण्यात उणी किंमत रु. १.२० लाख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
