१७० वरां भरतनाट्यम सादर करून ताणें केलो वर्ल्ड रेकॉर्ड
भांगरभूंय | प्रतिनिधी
मंगळुरू, खबरां संस्था: सेंट अलोशियस कॉलेज, मंगळुरूची बी. ए. च्या निमाण्या वर्सा शिकपी विद्यार्थिनी रेमोना एव्हेट परेरा हाणें सेगीत १७० वरां भरतनाट्यम सादर करून गोल्डन बुक ऑफ वर्ल्ड रेकॉर्डांत आपलें नांव नोंद केलें. संवसारांत हें काम करपी तें पयलेंच थारलें.
२१ जुलय सावन सुरू जाल्ली ही अद्वितीय नृत्य साधना आयज, २८ जुलयाक सोंपली. ह्या वेळार हजर आशिल्ले प्रेक्षक, तिचे पालक, शिक्षक आनी बरें मागप्यांनी नेटान ताळयो मारून तिका परबीं भेटयलीं. फाटलो विक्रम १२७ वरांचो आशिल्लो, जो २०२३ वर्सा १६ वर्सां पिरायेच्या सुधीर जगपथ हांणी केल्लो.
रेमोनाचें हें काम खरें म्हणल्यार जिद्द, धीर आनी घट इत्सेचें प्रतीक. सप्तकभर चलिल्ले हे कार्यावळींत जिल्लोधिकारी, जिल्लो पंचायत सीईओ, आमदार, जिल्हा प्रभारी मंत्री, मंगळुरूचे बिशप, नगरसेवक आनी हेर मानेस्तांनी भेट दिवन तिच्या समर्पणाची तोखणाय केली.
रेमोना फाटलीं १३ वर्सां येय्याडीच्या गुरु श्री विद्या हांच्या मार्गदर्शना खाला भरतनाट्यमांचे प्रशिक्षण घेता. ह्या विक्रमा खातीर ताणें कितलेशे म्हयने सद्दां ५ ते ६ वरां, कॉलेजी पयलीं आनी उपरांत मेहनत घेतली. ह्यान पयलींय २०२२ वर्सा ताका कला आनी संस्कृतीक मळावेलो ‘प्रधानमंत्री राष्ट्रीय बाल पुरस्कार’ फावो जाल्लो.
भरतनाट्यमा वांगडा तें सेमी-क्लासिकल, वेस्टर्न आनी कॉन्टेम्पररी नृत्य शैलींतूय फिशाल आसा. २०१७ वर्सा इंडिया बुक ऑफ रेकॉर्ड्स, गोल्डन बुक ऑफ रेकॉर्ड्स लंडन आनी भारत बुक ऑफ रेकॉर्ड्सांतूय स्थान मेळिल्लें.
तिच्या अद्वितीय नृत्यप्रदर्शनाची अधिकृत नोंदणी सध्या गोल्डन बुक ऑफ वर्ल्ड रेकॉर्ड्स कडेन धाडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
