भांगरभूंय | प्रतिनिधी
पेत्रोल, डिजेला वेल्यान दुसरे दिसाय कोफुसांव: कांय कडेन पंप सुक्यार
पणजीः इंधन सोंपपाचो भंय आजून मेरेन लोकां भितर आसा. आयजय लोकांनी पेत्रोल पंपांचेर घिट्टी घाल्ल्यान कांय पंपांचेर पेत्रोल काबार जावन तें बंद जालें. धपक्याक लोकांनी गर्दी करून पेत्रोल आनी डिजेलाचो सांठो केल्ल्यान पंप धनयांचें गणित घुस्पलां. मजगतीं तेल व्हरपी बोटी कालूच मुरगांव बंदराचेर दाखल जावन गोंयांतलो सांठो आनीक १५ दीस मेरेन वाडला. येता त्या आठ दिसां भितर आनीक एक बोट येतली. देखून लोकांनी चिंता करून सांठो करचो न्हय, असो उलो गोंय पेत्रोल डिलर्स एसोसीएशन अध्यक्ष नरहर ठाकूर हांणी मारला.
आखाती देशांत चलिल्ले गेर्राचे फाटभूंयेर प्रधानमंत्री नरेंद्र मोदी हांणी लाॅकडावना सारखी स्थिती जावपाची शक्यताय उक्तायले उपरांत सगळे लोक पॅनिक मोडार गेल्यात. काल रातीं सावन लोकांनी पेट्रोल पंपाचेर वचून पेत्रोल आनी डिजेलाचो सांठो करपाक सुरवात केली.
एका पेत्रोल पंपाचेर सरासरी दिसाक ९ हजार लिटर पेत्रोल आनी ३ हजार डिजल खपताले. काल ही संख्येत व्हड वाड जावन लोकांनी साडे अकरा हजार लिटर पेत्रोल आनी साडे स हजार लिटर डिजल विकतें घेतलां. हाका लागून पेत्रोल पंप धनयांचे सगळे गणीत हाल्लां.
इंधन पुरवण ही सुरळीत आसा. कांय पंपांनी पेत्रोल ना मात डिजल आसा. ज्या पंपांनी पेत्रोल रितें जालां ते टँकर हाडून कांय वरांनी भरतले. लोकांनी बेस्टेच भियेवन सांठो करचो न्हय, अशें नरहर ठाकूर हांणी सांगलें.
म्हजे कडेन आयज सकाळीं ६ हजार पेत्रोल आशिल्लें आनी ते दोन वरां भितर काबार जालें. आता म्हजो टँकर गेला तो दोन वरां भितर येवन भरतलो. लोकांनी चिंता करपाची गरज ना. झुवारी सांकवाळे टाकयांनी मुबलक इतलो सांठो आसा. मुख्यमंत्री डॉ. प्रमोद सावंत हांणी आठ दिसाचो सांठो आशिल्ल्याची बातमी खरी आशिल्ली. काल मुरगांवां बोट आयले उपरांत आतां १५ दिसांचो सांठो उपलब्ध आसा. ह्यो बोटी दरेक आठ दिसांनी येवन इंधन भरतात, अशी म्हायती ठाकूर हांणी दिली.
ज्या पंपानी पेत्रोल काबार जालां ते दिसभर सुक्यार पडूंकना. ते फकत कांय वरां खातीर बंद पडल्यात. फकत तांचे टँकर येवपाचे आसात. तांकां पयशे ट्रान्सफर केले उपरांत इंधन पावतलें. खयचेच पंप आठ वरां खातीर सुक्यार पडले अशें ना. दोन वरां भितर टँकर येता. दरेक पेट्रोल पंपांत तांचे स्वताचे टँकर आसात. पंप कर्मचार्याकडेन चवकशी केल्यार कितले वेळा भितर टँकर येतलो ताची ते म्हायती दितले, अशी सुचोवणी ठाकूर हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
