भांगरभूंय | प्रतिनिधी
पणजीः सगल्या पुलीस स्टेशनांनी आशिल्लीं रितीं पदां १५ ऑगस्टा पयलीं भरतले. ७०० पुलीस प्रशिक्षण घेवन पुलीस खात्यांत रुजू जावपाचे आसात, अशी म्हायती मुख्यमंत्री डॉ. प्रमोद सावंत हांणी दिली.
शुन्य वरा वेळार पुलीस स्टेशनांनी कर्मचार्यांचो उणावाचो प्रस्न विरोधी पक्ष फुडारी युरी आलेमाव हांणी मांडलो. चडश्या पुलीस स्टेशनांनी कर्मचार्यांचो उणाव आसा. हातूंत पुलीस उप निरिक्षक सारिकिल्ले हेर उच्च पदां रितीं आसात. उच्च न्यायालायान हाची स्वेच्छा दखल घेतल्या. गोंयांत वाडट्या गुन्यांवकारी घडणुकांचे फाटभूयेंर पुलिसांचो उणाव हो गंभीर विशय जावन आसा. हे विशीं मुख्यमंत्री कितें पावलां उखलतले, असो प्रस्न आलेमांव हांणी केलो.
हे विशीं उत्तर दितना मुख्यमंत्र्यान सांगलें, सद्यां राखीव दळांतले कर्मचारी पुलीस स्टेशनांत भरतले. ते भायर १२ ओगस्टाक पुलिसांचें निमाणें प्रशिक्षण आसाम राज्यांत जातलें. प्रशिक्षण घेतिल्ले ७०० पुलीस कर्मचारी नव्यान तयार जातले आनी तांकां १५ ओगस्टा पयलीं पुलीस स्टेशनांनी रितें आशिल्ल्या पदांचेर भरतले, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
